சென்னை: மெட்ரோ ரயில் பணி காரணமாக, புரசைவாக்கம் டவுட்டன் அருகே பெரம்பூர் பேரக்ஸ் ரோடு பகுதியில் போக்குவரத்து மாற்றம் செய்யப்பட்டு உள்ளதாக, போக்குவரத்து காவல்துறை அறிவித்து உள்ளது.
மெட்ரோ ரயில் நிலைய கட்டுமான பணி காரணமாக சென்னை முழுவதும் பல பகுதிகளில் போக்குவரத்து மாற்றம் அறிவிக்கப்பட்டு உள்ளது. இதனால் வாகன ஓட்டிகள் திண்டாடி வருகின்றனர். இந்த நிலையில், தற்போது சென்னை சென்னை டவ்டன் பகுதியில் போக்குவரத்து மாற்றம் செய்யப்படுவதாக அறிவிக்கப்பட்டு உள்ளது.
இது குறித்து சென்னை போக்குவரத்துத் துறை வெளியிட்ட செய்திக் குறிப்பில் , பெரம்பூர் பேரக்ஸ் சாலையில் வடமலை தெரு சந்திப்பு முதல் குட்டி தெரு சந்திப்பு வரை சாலை முழுவதும் ஆக்கிரமிப்பு செய்து மெட்ரோ ரயில் நிலையம் கட்டுமான பணி மேற்கொள்ள உள்ளதால், வாகனங்கள் பெரம்பூர் பேரக்ஸ் சாலையில் வடமலை தெரு சந்திப்பிலிருந்து பட்டாளம் சந்திப்பை நோக்கி நேராக செல்ல இயலாது.
எனவே வருகின்ற மே 18 முதல் மே 24 வரை ஒரு வார காலத்திற்கு சோதனை அடிப்படையில் கீழ்கண்ட போக்குவரத்து மாற்றங்கள் செயல்படுத்தப்படுகிறது.
1. டவ்டன் சந்திப்பிலிருந்து பெரம்பூர் பேரக்ஸ் சாலை வழியாக வரும் வாகனங்கள், வடமலை சந்திப்பிலிருந்து பட்டாளம் சந்திப்பை நோக்கி நேராக செல்ல இயலாது.
2. அத்தகைய வாகனங்கள் வடமலை தெரு சந்திப்பில் இடது புறம் திரும்பி வடமலை தெரு, அருணாசலம் தெரு மற்றும் வெங்கடேச பக்தன் தெரு வழியாக செல்லலாம்.
3. வடமலை தெரு, அருணாசலம் தெரு மற்றும் வெங்கடேச பக்தன் தெரு ஆகிய தெருக்கள் ஒரு வழி பாதையாக மாற்றப்படுகிறது.
4. பட்டாளம் சந்திப்பிலிருந்து பெரம்பூர் பேரக்ஸ் சாலை மற்றும் அஸ்டபுஜம் சாலை வழியாக டவ்டன் சந்திப்பை நோக்கி செல்லும் இரு மற்றும் நான்கு சக்கர வாகனங்களின் தற்போதைய போக்குவரத்தில் எந்த மாற்றமும் இல்லை.
5. புளியந்தோப்பு மற்றும் ஒட்டேரி சந்திப்பிலிருந்து மாநகரப் பேருந்துகள் மற்றும் கனரக வாகனங்களின் தற்போதைய போக்குவரத்தில் எந்த மாற்றமும் இல்லை
இவ்வாறு தெரிவிக்கப்பட்டுள்ளது.
