சென்னை
ஏற்கனவே சம்மன் அனுப்பியும் விசாரணைக்கு ஆஜராகாத மதுரை ஆதினத்துக்கு மீண்டும் சம்மன் அனுப்பப்பட்டுள்ளது.
சென்னை நோக்கி கடந்த மே 2-ம் தேதி வந்த மதுரை ஆதீனம் ஞானசம்பந்த தேசிக பரமாச்சாரிய சுவாமிகளின் காரும், சேலத்தில் இருந்து சென்னை நோக்கி வந்த காரும் உளுந்தூர்பேட்டை பகுதியில் மோதி விபத்துக்குள்ளானதில் 2 கார்களும் லேசாக சேத மடைந்தன.
விபத்துக்கு மறுநாள் காட்டாங்கொளத்தூரில் ஒரு நிகழ்ச்சியில் பேசிய மதுரை ஆதீனம், மாற்று மதத்தை சேர்ந்த சிலர் தன்னை கார் ஏற்றி கொல்ல முயன்றதாக குற்றம்சாட்டினார். காவல் துறை இதற்கு மறுப்பு தெரிவித்தது.
இதையொட்டி உயர் நீதிமன்ற வழக்கறிஞர் ராஜேந்திரன் அளித்த புகாரின்பேரில், இரு சமூகத்தினர் இடையே பகைமையை ஏற்படுத்துதல் உட்பட 4 பிரிவுகளின் கீழ் மதுரை ஆதீனம் மீது சென்னை கிழக்கு மண்டல சைபர் க்ரைம் காவல்துறையினர் வழக்கு பதிவு செய்தனர்.
விபத்து குறித்து நேரில் ஆஜராகி விளக்கம் அளிக்குமாறு ஆதீனத்துக்கு சைபர் க்ரைம் காவல்துறையினர் கடந்த 30-ம் தேதி சம்மன் அனுப்பினர். ஆயினும் மதுரை ஆதினம் ஆஜராகவில்லை.
எனவே சென்னை சேத்துப்பட்டு காவல் நிலைய வளாகத்தில் உள்ள சென்னை கிழக்கு மண்டல சைபர் க்ரைம் அலுவலகத்தில் வரும் 5-ம் தேதி ஆஜராகுமாறு மதுரை ஆதீனத்துக்கு மீண்டும் 2-வது முறையாக காவல்துறையினர் சம்மன் அனுப்பி உள்ளனர்.
