சென்னை: திமுகவைச் சேர்ந்த ஆபாச பேச்சாளர் சிவாஜி கிருஷ்ணமூர்த்தியின் 2 ஆண்டு சிறைத் தண்டனைக்கு சென்னை உயர்நீதிமன்றம் இடைக்காலத் தடை விதித்து உள்ளது.
தமிழக ஆளுநர் ஆர்.என். ரவி மற்றும் நடிகை குஷ்பு குறித்து அவதூறாகப் பேசிய வழக்கில், திமுக முன்னாள் பேச்சாளர் சிவாஜி கிருஷ்ணமூர்த்திக்கு விதிக்கப்பட்டிருந்த 2 ஆண்டு சிறைத் தண்டனையை நிறுத்திவைத்து சென்னை உயர்நீதிமன்றம் அதிரடி உத்தரவு பிறப்பித்து உள்ளது.
கடந்த 2023-ம் ஆண்டு பொதுக் கூட்டம் ஒன்றில் பேசிய சிவாஜி கிருஷ்ண மூர்த்தி, தமிழக ஆளுநர் ஆர்.என். ரவி மற்றும் பாஜக நிர்வாகியும் நடிகையுமான குஷ்பு ஆகியோரை மிகவும் ஆபாசமாகவும், அவதூறாகவும் விமர்சித்ததாகப் புகார் எழுந்தது. இது தொடர்பாகப் பல பிரிவுகளின் கீழ் வழக்குப் பதிவு செய்யப்பட்டு, அவர் கட்சியிலிருந்து நீக்கப்பட்டதோடு கைது செய்யப்பட்டார்.
இந்த வழக்கை விசாரித்த சென்னை மாவட்ட செஷன்ஸ் நீதிமன்றம், கடந்த சில மாதங்களுக்கு முன்பு தீர்ப்பளித்தது. அதில், சிவாஜி கிருஷ்ணமூர்த்தி மீதான குற்றச்சாட்டுகள் ஆதாரத்துடன் நிரூபிக்கப்பட்டதால், அவருக்கு 2 ஆண்டுகள் சிறைத் தண்டனை மற்றும் அபராதம் விதித்து உத்தரவிட்டது.
செஷன்ஸ் நீதிமன்றத்தின் இந்தத் தீர்ப்பை எதிர்த்து, சிவாஜி கிருஷ்ணமூர்த்தி தரப்பில் சென்னை உயர்நீதிமன்றத்தில் மேல்முறையீடு செய்யப்பட்டது. இந்த மனுவை இன்று விசாரித்த நீதியரசர், கீழமை நீதிமன்றம் விதித்த 2 ஆண்டு சிறைத் தண்டனையை நிறுத்திவைத்து (Stay) உத்தரவிட்டார்.
விசாரணையின்போது, சிவாஜி கிருஷ்ணமூர்த்தி தரப்பு வழக்கறிஞர், இந்த வழக்கில் சில சட்ட நுணுக்கங்கள் கவனிக்கப்படவில்லை என்றும், தண்டனை அதிகம் என்றும் வாதிட்டார். மனுவை ஏற்றுக் கொண்ட உயர்நீதிமன்றம், வழக்கின் இறுதித் தீர்ப்பு வரும் வரை தண்டனைக்கு இடைக்காலத் தடை விதிப்பதாக அறிவித்தது. இது சிவாஜி கிருஷ்ணமூர்த்திக்குத் தற்காலிகமாகப் பெரும் நிம்மதியை அளித்துள்ளது.
அவதூறு பேச்சு வழக்குகளில் அண்மைக்காலமாக நீதிமன்றங்கள் கடுமையான நிலைப்பாட்டை எடுத்து வரும் சூழலில், இந்தத் தடை உத்தரவு அரசியல் வட்டாரத்தில் முக்கியத்துவம் வாய்ந்ததாகப் பார்க்கப்படுகிறது.
[youtube-feed feed=1]