6வது கட்ட ஊரடங்கு நாளையுடன் (ஜூலை 30ந்தேதி) முடிவடைய உள்ள நிலையில், இன்று மருத்துவ நிபுணர்களுடன் தமிழக முதல்வர் எடப்பாடி பழனிசாமி ஆலோசனை நடத்தி வருகிறார்.
கொரோனா தடுப்பு நடவடிக்கையாக நாடு முழுவதும் 6வது கட்டமாக அறிவிக்கப்பட்ட லாக் டவுன் வருகிற 31-ந்தேதியுடன் முடிவுக்கு வருகிறது. இடையில் பல்வேறு தளர்வுகளும் அறிவிக்கப்பட்டு உள்ளது. அத்துடன் கொரோனா பரவலை தடுக்க அரசு பல்வேறு நடவடிக்கைகளை எடுத்து வருகிறது. இருந்தாலும் தமிழகத்தில் தொற்று பரவல் அதிகரித்துக்கொண்டே தான் வருகிறது.
இந்த நிலையில், ஊரடங்கை நீட்டிப்பது, மேலும் தளர்வுகள் அறிவிப்பது மற்றும், கொரோனா பாதிப்பு மற்றும் தடுப்பு நடவடிக்கைகள் குறித்து தலைமை செயலகத்தில் தமிழக முதல்வர் நேற்று மாவட்ட ஆட்சியர்களுடன் ஆலோசனை நடத்தினார்.
அதைத்தொடர்ந்து, இன்று மருத்துவ நிபுணர் குழுவுடன் முதலமைச்சர் எடப்பாடி பழனிசாமி ஆலோசனை நடத்தி வருகிறார்.
இதைத்தொடர்ந்து, இன்று மாலை புதிய தளர்வுகள், கட்டுப்பாடுகள் குறித்து தமிழக அரசு அறிவிப்பு வெளியிடும் என எதிர்பார்க்கப்படுகிறது.
