சென்னை: சென்னை தேனாம்பேட்டையில் காங்கிரஸ் அறக்கட்டளைக்கு சொந்தமாக பல கோடி ரூபாய் மதிப்புள்ள நிலத்தை பல ஆண்டுகளாக வைத்திருந்த தனியார் கட்டுமான நிறுவனத்தின் வழக்கை உயர்நீதிமன்றம் தள்ளுபடி செய்தது.
சென்னையில் உள்ள தமிழ்நாடு காங்கிரஸ் கமிட்டிக்கு சொந்தமான இடம், மவுண்ட் ரோடு பகுதியில், அதாவது சென்னை தேனாம்பேட்டையில் அமைந்துள்ள காமராஜர் அரங்க வளாகத்திற்குள் அமைந்துள்ளது.
இந்த நிலத்தில் வணிக வளாகம் கட்டுவதற்காக கடந்த 1996-ம் ஆண்டு பிரபல கட்டுமான நிறுவனமான புளூ பேர்ல் என்ற தனியார் நிறுவனத்துடன் காங்கிரஸ் அறக்கட்டளை ஒப்பந்தம் போட்டது. ஆனால், அந்த பணிகள் தொடங்கப்படவில்லை. இதுதொடர்பாக அந்த நிறுவனத்துக்கும், காங்கிரஸ் கட்சிக்கும் இடையே மோதல் போக்கு எழுந்தது. இதனால், அந்த நிறுவனம் வசம் ஒப்படைக்கப்பட்ட அந்த நிலத்தை பராமரிப்பது தொடர்பாக ஆட்சேபமில்லா சான்று வழங்க காங்கிரஸ் கட்சி மறுத்து விட்டது. இதனால், அந்த இடம் தனியார் வசமே இருந்து வந்தது.
இதுதொடர்பாக, தனியார் கட்டுமான நிறுவனம் புளூ பேர்ல் தரப்பில் வழக்கு தொடரப்பட்டு வழக்கு நிலுவையில் இருந்து வந்தது.
இந்த நிலையில், இந்த இடத்தை கடந்த மே மாதம் 5ந்தேதி தமிழ்நாடு காங்கிரஸ் கட்சியை சேர்ந்தவர்கள் அதிரடியாக மீட்டனர். அத்துடன் தனியார் நிறுவனத்தினர் செல்லும் பாதையை அடைத்து, இரவோடு இரவாக சுவர் எழுப்பப்பட்டது. இதனால் இரு தரப்புக்கும் இடையே பேச்சுவார்த்தை நடந்தது.
மேலும், காங்கிரஸ் அறக்கட்டளையின் இந்த நடவடிக்கையை எதிர்த்து தனியார் நிறுவனம் (புளூ பேர்ல்) தரப்பில் சென்னை உயர் நீதிமன்றத்தில் வழக்கு தொடரப்பட்டது. இந்த வழக்கு நீதிபதி அப்துல் குத்தூஸ் முன்பாக விசாரணைக்கு வந்தது.
அப்போது தனியார் நிறுவனம் தரப்பில், “இந்த வழக்கு நிலுவையில் இருக்கும்போது அந்த நிலத்தை காங்கிரஸ் அறக்கட்டளை நிர்வாகிகள் தங்களது கட்டுப்பாட்டில் சுவாதீனம் எடுத்துக்கொண்டதால், இந்த வழக்கு செல்லாததாகிவிட்டது. ஆகவே வழக்கை திரும்பப் பெற அனுமதியளிக்க வேண்டும்” என்று கேட்கப்பட்டது.
அதையேற்ற நீதிபதி, காங்கிரஸ் அறக்கட்டளைக்கு எதிரான இந்த வழக்கை தள்ளுபடி செய்து உத்தரவிட்டுள்ளார்.
