சென்னை: வேளாண் சட்டங்களுக்கு எதிராக டெல்லியில் போராடிவரும் விவசாயிகளுக்கு ஆதரவாக திமுக இன்று தமிழகம் முழுவதும் மாவட்டத் தலைநகரங்களில் கருப்புக்கொடி ஏந்தி போராட்டம் நடத்துகிறது. சேலத்தில் இன்று காலை காலை 10 மணிக்கு நடைபெறும் போராட்டத்தில் திமுக தலைவர் மு.க.ஸ்டாலின் கலந்துகொள்கிறார்.
மத்திய அரசு கொண்டு வந்த வேளாண் சட்டங்களுக்கு எதிராக நாடு முழுவதும் விவசாயிகள் போராட்டம் நடைபெற்று வருகிறது. டெல்லி சலோ என்ற பெயரில் வடமாநில விவசாயிகள் டெல்லியில் குவிந்து போராட்டத்தை தொடர்ந்து வருகின்றன. போராட்டம் ஒருவாரத்தை கடந்துள்ளது.
இதையடுத்து, விவசாயிகள் போராட்டம் குறித்து திமுக தலைவர் மு.க.ஸ்டாலின் தலைமையில் திமுக மாவட்ட செயலாளர்கள் கூட்டம் நடத்தப்பட்டு ஆலோசிக்கப்பட்டது. அதையடுத்து, மாவட்டத் தலைநகரங்களில் டிசம்பர் 5-ஆம் தேதி கருப்புக்கொடி போராட்டம் நடைபெறுமென ஒரு மனதாக தீர்மானம் நிறைவேற்றப்பட்டது.
இதையடுத்து, டெல்லியில் போராடும் விவசாயிகளுக்கு ஆதரவாக இன்று காலை 10 மணிக்கு மாவட்ட தலைநகரங்களில் திமுக சார்பில் கருப்பு கொடி ஏந்தி போராட்டம் நடைபெறுகிறது. சேலத்தில் நடைபெறும் போராட்டத்தில் திமுக தலைவர் மு.க.ஸ்டாலின் பங்கேற்கிறார்.