கரூர்: முன்னாள் முதல்வர் கருணாநிதி குறித்து அவதூறாக பேசியது தொடர்பாக நீதிமன்ற அனுமதியின் பேரில், சீமான் மீது கரூர் மாவட்டம் தாந்தோணிமலை காவல் நிலையத்தில் வழக்குப்பதிவு செய்யப்பட்டுள்ளது.
விக்கிரவாண்டி சட்டப்பேரவை இடைத்தேர்தல் பிரச்சாரத்தில் பேசிய நாம் தமிழர் கட்சியைச் சேர்ந்த சாட்டை துரைமுருகன் முன்னாள் முதல்வர் கருணாநிதி குறித்து அவதூறாக பாடல் பாடினார். இதுகுறித்து திருச்சி மாவட்டத்தில் வழக்குப் பதிவு செய்யப்பட்டது. இந்த பாடல் பல ஆண்டுகளாக அரசியல் களத்தில் பாடப்பட்டு வந்த நிலையில், இடைத்தேர்தலின்போது பேசப்பட்டது அரசியலாக்கப்பட்டது. சண்டாளர் என ஒரு சாதி இருப்பதாகவும், அதனால் அதுகுறித்து பாடப்பட்டது தவறு என கூறப்பட்டது.அவதூறான வார்த்தைகளை பயன்படுத்தினார் என குற்றம் சாட்டப்பட்டது. இதுதொடர்பாக திமுகவினர் பலர் சென்னை உள்பட மாநிலம் முழுவதும் சீமான், சாட்டை முருகன் என பலர்மீது அடுத்தடுத்து புகார் கொடுத்தனர்.
இதையடுத்து நாம் தமிழர் கட்சி தலைமை ஒருங்கிணைப்பாளர் சீமான் மீது மேற்படி விவகாரத்தில் நடவடிக்கை எடுக்கக்கோரி கரூரைச் சேர்ந்த வழக்கறிஞர் தமிழ் ராஜேந்திரன் ஆக.5ம் தேதி கரூர் மாவட்ட ஆட்சியரிடம் புகார் அளித்தார். ஆக.14-ம் தேதி தாந்தோணிமலை காவல் நிலையம், எஸ்.பி. அலுவலகத்திற்கு புகார் அனுப்பினார். இவற்றில் எவ்வித நடவடிக்கையும் எடுக்கப்படாத நிலையில் கரூர் கு ற்றவியல் நடுவர் நீதிமன்றம் 1ல் கடந்த ஆகஸ்ட் 19-ம் தேதி வழக்கு தொடர்ந்தார்.
இந்த வழக்கை நேற்று (நவம்பர் 7ந்தேதி) விசாரித்த நீதிமன்றம் விசாரணைக்கு ஏற்றுக்கொண்டது. தொடர்ந்து, கரூர் குற்றவியல் நடுவர் நீதிமன்றம் 1-ல் இவ்வழக்கில் அக்.14-ம் தேதி விசாரணைக்கு அனுமதி வழங்கி தாந்தோணிமலை காவல் நிலையம் இவ்வழக்கை விசாரித்து நடவடிக்கை எடுக்க உத்தரவிட்டது.
இதையடுத்து நீதிமன்ற உத்தரவின்படி நாம் தமிழர் கட்சி தலைமை ஒருங்கிணைப்பாளர் சீமான் மீது தாந்தோணிமலை காவல் நிலையத்தில் நேற்று (நவ.7-ம் தேதி) அவதூறாக பேசுதல், இழிவுபடுத்தும் நோக்கத்தில் பேசி இணைய தளத்தில் வெளியிடுதல் உள்ளிட்ட இரு பிரிவுகளின் வழக்குப்பதிவு செய்யப்பட்டுள்ளது.
இவ்வழக்கில் நாம் தமிழர் கட்சி தலைமை ஒருங்கிணைப்பாளர் சீமானுக்கு அபராதத்துடன் 2 ஆண்டுகள் வரை சிறை தண்டனை வழங்க வாய்ப்புள்ளது என வழக்கறிஞர் தமிழ் ராஜேந்திரன் தெரிவித்தார்.