ரியோடிஜெனிரா: கத்தாரில் 2022ம் ஆண்டு நடைபெறவுள்ள உலகக்கோப்பை கால்பந்து தொடருக்கான தகுதிச்சுற்றுப் போட்டிகளில், தென்அமெரிக்க அளவில் பிரேசில் அணி பட்டியலில் முதலிடம் பெற்றுள்ளது.
உலகக்கோப்பைக்கான தகுதிச்சுற்றுப் போட்டிகள் லத்தீன் அமெரிக்காவில் நடைபெற்று வருகின்றன. தற்போதைய நிலையில், மொத்தம் 3 போட்டிகளில் ஆடி, அனைத்திலும் வென்று 9 புள்ளிகளை எடுத்த பிரேசில் அணி, பட்டியலில் முதலிடம் வகிக்கிறது.
நேற்று வெனிசுலாவை சந்தித்த பிரேசில் அணி 1-0 என்ற கணக்கில் வென்றது. பிரேசில் அணி, தனது அடுத்தப் போட்டியில் உருகுவேயை சந்திக்கிறது. உருகுவே அணி, ஏற்கனவே கொலம்பியாவை 3-0 என்ற கணக்கில் வென்றுள்ளது.
மேலும், இன்னொரு போட்டியில், பெருவை 2-0 என்ற கோல் கணக்கில் சிலி வென்றது. தற்போதைய நிலையில், பட்டியலில் முதலிடத்தில் பிரேசிலும், இரண்டாமிடத்தில் அர்ஜெண்டினாவும் உள்ளன.