பஞ்சாபில் உள்ள அமிர்தசரஸ் மற்றும் பாகிஸ்தானில் உள்ள லாகூருக்கு அருகில் அமைந்துள்ள அட்டாரி-வாகா எல்லை இந்தியா பாகிஸ்தான் பதற்றம் காரணமாக மூடப்பட்டது.
இந்தியாவில் உள்ள பாகிஸ்தானியர்கள் வெளியேற ஏப்ரல் 30 ஆம் தேதி வரை அரசாங்கம் அவகாசம் அளித்திருந்தது.
இந்த காலக்கெடு முடிவடைந்ததை அடுத்து அட்டாரி – வாகா எல்லை நேற்று மூடப்பட்டது. இதன் விளைவாக, 70க்கும் மேற்பட்ட பாகிஸ்தானியர்கள் இந்தியாவில் சிக்கித் தவித்தனர்.
இந்த நிலையில் இந்தியாவில் சிக்கித் தவிக்கும் பாகிஸ்தான் நாட்டினரை உள்ளே நுழைய அனுமதிக்கும் வகையில் வாகா எல்லையை பாகிஸ்தான் இன்று மீண்டும் திறந்துள்ளது.
இதுகுறித்து பாகிஸ்தான் வெளியுறவு அமைச்சக செய்தித் தொடர்பாளர் ஊடகங்களுக்கு அளித்த பேட்டியில், “அட்டாரி எல்லையில் பாகிஸ்தான் குடிமக்கள் சிக்கித் தவிப்பதாக தகவல்கள் வந்துள்ளன” என்றார். “இந்திய அதிகாரிகள் அனுமதித்து அவர்களின் எல்லைகளைத் திறந்தால், எங்கள் குடிமக்களை நாட்டிற்குள் அனுமதிக்க நாங்கள் தயாராக இருக்கிறோம்,” என்று அவர் கூறினார்.
“வரும் நாட்களில் பாகிஸ்தான் நாட்டினர் திரும்புவதற்காக வாகா எல்லை திறந்திருக்கும்.” பாகிஸ்தானியர்களுக்கான விசாக்களை ரத்து செய்ததன் மூலம் இந்திய அரசாங்கம் கடுமையான மனிதாபிமான சவால்களை எதிர்கொண்டுள்ளது. “பலர் மருத்துவ சிகிச்சையை அணுகுவதில் சிரமப்படுகிறார்கள், மேலும் சிலர் தங்கள் குடும்பங்களிலிருந்து பிரிக்கப்பட்டுள்ளனர்,” என்று அவர் கூறினார்.
