திண்டுக்கல்
எம் ஜி ஆர் நினைவு நாள் நிகழ்வுக்கு வந்த அதிமுகவினரைப் பள்ளி மாணவர் போல் அதிமுக நிர்வாகி வருகைப் பதிவு எடுத்துள்ளார்.
பள்ளிகளில் ஆசிரியர்கள் ஒவ்வொரு தினமும் மாணவர்களுக்கு வருகை பதிவு எடுப்பது வழக்கமாகும். ஆசிரியர்கள் மாணவர்களின் பெயரை ஒன்றொன்றாகப் படிக்க மாணவர்கள் தங்கள் வருகையைப் பதிவு செய்வார்கள். இதைப் போல் இன்று திண்டுக்கல்லில் அதிமுக நிர்வாகி ஒருவர் எம் ஜி ஆர் நினைவு நாள் விழாவுக்கு வந்தவர்களை வருகைப்பதிவு செய்துள்ளார்.
இன்று மறைந்த முதல்வர் எம் ஜி ஆர் 34 ஆம் நினைவு நாள் தமிழகம் எங்கும் அனுசரிக்கப்படுகிறது. அதில் திண்டுக்கல் பேருந்து நிலையம் அருகே உள்ள எம் ஜி ஆர் சிலைக்கு அதிமுக முன்னாள் அமைச்சர் திண்டுக்கல் சீனிவாசன் மாலை அணிவிக்கும் நிகழ்ச்சி நடந்தது. இதற்கு அதிமுக தொண்டர்கள் மற்றும் நிர்வாகிகள் எனப் பலர் வருகை தந்தனர்.
ஒலிபெருக்கி மூலம் தொண்டர்கள் மற்றும் வார்டு நிர்வாகிகள் பெயரை ஒரு நிர்வாகி ஒலிபெருக்கி மூலம் படித்தார். நிகழ்ச்சிக்கு வந்தவர்கள் தங்கள் கைகளை உயர்த்தி தங்கள் வருகையைப் பதிவு செய்துள்ளனர். அதிமுக தனது கட்சியினரை மாணவர்கள் போல நடத்தி வருகை பதிவு செய்தது பலரையும் சிரிக்க வைத்துள்ளது.