ஸ்ரீநகர்:
ஜம்மு காஷ்மீரில் பாதுகாப்பு படையினர் நடத்திய தேடுதல் வேட்டையின்போது, பயங்கரவாதி ஒருவன் என்கவுண்டர் செய்யப்பட்டான்.
காஷ்மீர் மாநிலத்தில் பயங்கரவாதிகளின் அத்துமீறி தாக்குதல்கள் தொடர்ந்து நடைபெற்று வருகிறது. இந்நிலையில், பயங்கரவாதிகளை வேட்டையாட பாதுகாப்பு படையினர் தீவிர தேடுதல் வேட்டை நடத்தி வருகின்றனர்.
இந்நிலையில், ஜம்மு காஷ்மீர் மாநிலம் பந்திப்போரா மாவட்டத்தில் உள்ள ஹாஜின் என்ற பகுதியில் பயங்கரவாதிகள் பதுங்கி இருப்பதாக கிடைத்த தகவலை தொடர்ந்து, அந்த பகுதியை சுற்றி வளைத்த பாதுகாப்பு படையினர் பயங்கரவாதிகளை தேடினர்.
அப்போது, ஷகுர்தின் என்ற கிராம பகுதியில் உள்ள ஒரு வீட்டில் பதுங்கியிருந்த பயங்கரவாதிகள் பாதுகாப்பு படையினர் மீது துப்பாக்கியால் சுடத்தொடங்கினர்.
இதையடுத்து பாதுகாப்பு படையினர் மேற்கொண்ட அதிரடி நடவடிக்கையில் ஒரு பயங்கரவாதி என்கவுண்டர் செய்யப்பட்டதாகவும், மற்றவர்களை தேடும் பணி தொடர்ந்து நடைபெற்று வருவதாகவும் பாதுகாப்பு படை அதிகாரிகள் கூறி உள்ளனர்.