சென்னை,
பிரபல டைரக்டர் ராஜமவுலி இயக்கத்தில் பிரபாஸ், அனுஷ்கா, தமன்னா, ராணா நடித்த படம் ‘பாகுபலி-2’. இந்த படம் இதுவரை எந்த படமும் விற்பனையாக அளவுக்கு மேல் விற்பனையாகி வரலாற்று சாதனை படைத்துள்ளது.
இந்த பிரமாண்டமான படம் தமிழ், தெலுங்கு, கன்னடம், இந்தி ஆகிய 4 மொழிகளில் தயாரிக்கப்பட்டு உள்ளது. இன்று உலகம் முழுவதும் பாகுபலி-2 படம் வெளியாகி உள்ள நிலையில், தமிழகத்தில் வெளியாவதில் சிக்கல் ஏற்பட்டது.
படம் இன்று வெளியாவதால், சிறப்புக்காட்சி அதிகாலை 4.30 மணியில் இருந்து திரையிட திட்டமிடப்பட்டு இருந்தன.
இந்த நிலையில், தயாரிப்பாளர்களுக்கும் விநியோகஸ்தர்களுக்கும் இடையே ஏற்பட்ட பிரச்னை காரணமாக ,’பாகுபலி-2′ திரைப்படத்தின் காலைக் காட்சிகள் ரத்தானதாகத் தகவல்கள் வந்துள்ளன.
காலை 9.30 மணி வரை புக் செய்யப்பட்டிருந்த காட்சிகள், பல ஊர்களில் ரத்து செய்யப்பட்டு விட்டன. இதனால், திரையரங்குகளுக்கு காலையிலேயே சென்ற ரசிகர்கள், ஏமாற்றத்துடன் திரும்பினர்.
தொடர்ந்து நடைபெற்று வந்த பேச்சு வார்த்தையில் ஏற்பட்ட சுமூகமான முடிவு காரணமாக சுமார் 11 மணிக்கு மேல் படம் திரையிடப்பட்டு வருகிறது.
இந்நிலையில், பாகுபலி-2ன் தமிழ் பதிப்பை இணையதளத்தில் வெளியிட்டு அதிர்ச்சியை ஏற்படுத்தி உள்ளது தமிழ் ராக்கர்ஸ் இணையதளம்.
இன்று காலை முதலே, ரசிகர்கள் படம் எப்போது வெளியாகும் என்று எதிர்பார்த்து தியேட்டர் வாசலில் காத்துக்கொண்டிருந்த வேளையில், தமிழ் ராக்கர்ஸ் இணையதளம் படத்தை வெளியிட்டு படக்குழுவினருக்கு அதிர்ச்சியை கொடுத்துள்ளது.
இந்த படத்தை இதுவரை ஆயிரத்துக்கும் மேற்பட்டோர் பதிவிறக்கம் செய்துள்ளதாக தெரிகிறது.
தமிழகத்தின் பல பகுதிகளில் இன்னும் படமே வெளிவராதபோது, இப்படி முழுப் படமும் இணையத்தில் வெளியாகி இருப்பது தயாரிப்பாளர்கள் தரப்பைப் பெரும் அதிர்ச்சியில் ஆழ்த்தியுள்ளது.
படம் தரவிறக்கம் செய்யப்படுவதை தடுக்க முயற்சிகள் மேற்கொள்ளப்பட்டு வருகின்றன.