இந்திய டி20 கிரிக்கெட் அணியின் புதிய கேப்டனாக ஸ்ரேயாஸ் ஐயர் நியமிக்கப்பட்டுள்ளார்.
இதுவரை கேப்டனாக இருந்த சூர்யகுமார் யாதவ், அயர்லாந்து மற்றும் இங்கிலாந்து சுற்றுப்பயணத்துக்கான இந்திய அணியில் இருந்து நீக்கப்பட்டுள்ளார்.
அதே நேரத்தில், 15 வயதான இளம் வீரர் வைபவ் சூர்யவன்ஷிக்கு முதல் முறையாக இந்திய அணியில் இடம் வழங்கப்பட்டுள்ளது.
2028-ம் ஆண்டு லாஸ் ஏஞ்சல்ஸ் ஒலிம்பிக் போட்டி மற்றும் டி20 உலகக் கோப்பையை இலக்காகக் கொண்டு இந்திய அணி கட்டமைக்கப்பட்டு வருவதாக தேர்வுக்குழு தெரிவித்துள்ளது.
ஸ்ரேயாஸ் ஐயர் மற்றும் வைபவ் சூர்யவன்ஷி தவிர, நிதிஷ் குமார் ரெட்டி, ரவி பிஷ்னோய் மற்றும் பிரின்ஸ் யாதவ் ஆகியோரும் அணியில் சேர்க்கப்பட்டுள்ளனர்.
மறுபுறம், ரிங்கு சிங் மற்றும் குல்தீப் யாதவ் ஆகியோர் அணியில் இடம் பெறவில்லை. ஹர்திக் பாண்ட்யா மற்றும் ஜஸ்பிரித் பும்ராவுக்கு ஓய்வு அளிக்கப்பட்டுள்ளது.
புதிய கேப்டனாக நியமிக்கப்பட்டுள்ள 31 வயதான ஸ்ரேயாஸ் ஐயர், டிசம்பர் 2023-க்குப் பிறகு இந்திய டி20 அணிக்காக விளையாடவில்லை. இருப்பினும், ஐபிஎல் தொடரில் சிறந்த கேப்டனாக தன்னை நிரூபித்துள்ளார்.
மறுபுறம், வைபவ் சூர்யவன்ஷி இந்திய ஆடவர் அணிக்குத் தேர்வு செய்யப்பட்டுள்ள இள வயது வீரர்களில் ஒருவராக உருவெடுத்துள்ளார். சமீபத்திய ஐபிஎல் தொடரில் 776 ரன்களை அதிரடியாக குவித்து அனைவரது கவனத்தையும் ஈர்த்தார்.
அயர்லாந்து அல்லது இங்கிலாந்து தொடரில் வைபவ் அறிமுக வீரராக களமிறங்கினால், 16 வயதுக்கு முன்பே இந்தியாவுக்காக சர்வதேச கிரிக்கெட்டில் அறிமுகமான முதல் வீரர் என்ற பெருமையை பெறுவார். இதுவரை சச்சின் டெண்டுல்கர்தான் மிக இளம் வயதில் இந்திய அணிக்காக அறிமுகமான வீரராக உள்ளார்.
இந்தியா, அயர்லாந்துக்கு எதிராக ஜூன் 26 மற்றும் 28 ஆகிய தேதிகளில் பெல்பாஸ்டில் இரண்டு டி20 போட்டிகளில் விளையாடுகிறது. அதைத் தொடர்ந்து ஜூலை 1 முதல் 11 வரை இங்கிலாந்துக்கு எதிராக ஐந்து டி20 போட்டிகள் நடைபெறுகின்றன.
அயர்லாந்து மற்றும் இங்கிலாந்து தொடருக்கான இந்திய டி20 அணி:
ஸ்ரேயாஸ் ஐயர் (கேப்டன்), அபிஷேக் சர்மா, சஞ்சு சாம்சன், இஷான் கிஷன், சிவம் துபே, திலக் வர்மா (துணை கேப்டன்), நிதிஷ் குமார் ரெட்டி, அக்சர் படேல், வாஷிங்டன் சுந்தர், வருண் சக்கரவர்த்தி, ரவி பிஷ்னோய், முகமது சிராஜ், ஹர்ஷித் ராணா, அர்ஷ்தீப் சிங், பிரின்ஸ் யாதவ்.
[youtube-feed feed=1]