உத்தரப் பிரதேசத்தில் வாக்காளர் பட்டியலில் முறைகேடு நடந்ததாக எழுந்த புகாரில், 10,470 வாக்காளர் பதிவுகள் மீது சந்தேகம் எழுந்துள்ளது. இதையடுத்து, தேர்தல் பணியில் இருந்த கணினி உதவியாளர் பணிநீக்கம் செய்யப்பட்டுள்ளதுடன், 2 தேர்தல் அதிகாரிகள் மீதும் சட்ட நடவடிக்கை எடுக்க உத்தரவிடப்பட்டுள்ளது.
பிலிபித் சட்டமன்றத் தொகுதியில் வாக்காளர் அடையாள அட்டை விவரங்கள் மாற்றப்பட்டதாகப் புகார்கள் எழுந்தன. இதுகுறித்து நடத்தப்பட்ட விசாரணையில், முறைகேடுகள் கண்டறியப்பட்டதாக உத்தரப் பிரதேச தலைமைத் தேர்தல் அதிகாரி அலுவலகம் தெரிவித்துள்ளது.
கடந்த 2026-ம் ஆண்டு மே 31 முதல் ஆகஸ்ட் 29 வரை, வாக்காளர் விவரங்களைத் திருத்துவதற்கான படிவம்-8 மூலம் 13,779 விண்ணப்பங்களை கணினி உதவியாளர் பதிவு செய்துள்ளார். அவற்றில் 10,470 விண்ணப்பங்கள் ஏற்கப்பட்டுள்ளன. மீதமுள்ள 3,309 விண்ணப்பங்கள் நிராகரிக்கப்பட்டுள்ளன.
ஆனால், ஏற்கப்பட்ட மற்றும் நிராகரிக்கப்பட்ட விண்ணப்பங்களுக்கான அசல் படிவங்களோ, அதற்கான ஆவணங்களோ அலுவலகத்தில் கிடைக்கவில்லை என விசாரணையில் தெரியவந்துள்ளது. இதனால், வாக்காளர் பட்டியலில் செய்யப்பட்ட திருத்தங்கள் மீது சந்தேகம் எழுந்துள்ளது.
இதையடுத்து, வாக்காளர் பதிவு மையத்தில் பணியாற்றிய கணினி உதவியாளர் அனில் குமார் பணிநீக்கம் செய்யப்பட்டுள்ளார். சம்பந்தப்பட்ட காலகட்டத்தில் தேர்தல் அதிகாரிகளாகப் பணியாற்றிய துணை ஆட்சியர்கள் மயங்க் கோஸ்வாமி, ஹேமந்த் சௌத்ரி ஆகியோர் மீது துறை ரீதியான விசாரணைக்கும் உத்தரவிடப்பட்டுள்ளது.
மேலும், மக்கள் பிரதிநிதித்துவச் சட்டம், 1950-ன் பிரிவு 32 மற்றும் பாரதிய நியாய சன்ஹிதாவின் தொடர்புடைய பிரிவுகளின் கீழ் சட்ட நடவடிக்கை எடுக்கவும் அதிகாரிகள் உத்தரவிட்டுள்ளனர்.
13,150 வாக்காளர்களின் அடையாள அட்டையில் ஒரே எண்?
இந்த விவகாரம், வாக்காளர் அடையாள அட்டைகளில் ஒரே எண் பலருக்குப் பயன்படுத்தப்பட்டதாக எழுந்த புகாரைத் தொடர்ந்து பெரும் சர்ச்சையானது. பிலிபித் சதார் தொகுதியில் 13,150 வாக்காளர்களுக்கு ஒரே மாதிரியான வாக்காளர் அடையாள அட்டை எண்கள் இருப்பதாகவும், அவர்களின் பெயர்கள் மற்றும் தந்தையர் பெயர்கள் வெவ்வேறாக இருப்பதாகவும் காங்கிரஸ் கட்சி குற்றம்சாட்டியது.
சமாஜ்வாதி கட்சியும் இதுதொடர்பாகக் கேள்வி எழுப்பியது. இதையடுத்து, வாக்காளர் பட்டியல் தொடர்பான பணிகளில் இருந்து சம்பந்தப்பட்ட தேர்தல் பதிவு அதிகாரியையும் கணினி உதவியாளரையும் உடனடியாக நீக்கி, உத்தரப் பிரதேச தலைமைத் தேர்தல் அதிகாரி நவ்தீப் ரின்வா உத்தரவிட்டார்.
இதற்கிடையே, ஏப்ரல் 10 முதல் அக்டோபர் 21 வரை கணினி உதவியாளர் பதிவு செய்த பெயர் சேர்க்கைக்கான படிவம்-6 மற்றும் பெயர் நீக்கத்துக்கான படிவம்-7 விண்ணப்பங்களையும் விரிவாக ஆய்வு செய்ய உத்தரவிடப்பட்டுள்ளது. இதுதொடர்பான அறிக்கையை ஒரே நாளில் சமர்ப்பிக்கவும் அதிகாரிகள் அறிவுறுத்தப்பட்டுள்ளனர்.
மேலும், விதிமுறைகளுக்கு மாறாகப் பதிவு செய்யப்பட்டதாகக் கூறப்படும் 10,470 விண்ணப்பங்களையும் ஆய்வு செய்து, உரிய நடைமுறைகளின்படி வாக்காளர் விவரங்களைச் சரிசெய்யும் பணிகள் நடைபெற்று வருகின்றன.
வாக்காளர் பட்டியல் திருத்தங்களில் முறைகேடு நடந்ததாக எழுந்த புகார், கணினி உதவியாளர் பணிநீக்கம், இரண்டு தேர்தல் அதிகாரிகள் மீது நடவடிக்கை என உத்தரப் பிரதேசத்தில் இந்த விவகாரம் அரசியல் ரீதியாகவும் பரபரப்பை ஏற்படுத்தியுள்ளது.