மும்பை கோரேகானில், 18 மாத பெண் குழந்தை அடுக்குமாடிக் குடியிருப்பின் 6-வது மாடியில் இருந்து கீழே விழுந்து உயிரிழந்த சம்பவத்தில், 10 வயது சிறுமி மீது கொலை வழக்குப் பதிவு செய்யப்பட்டுள்ளது. பக்கத்து வீட்டில் வசிக்கும் அந்தச் சிறுமி, குழந்தையைத் தூக்கி படிக்கட்டுப் பகுதியில் இருந்து கீழே வீசியதாகக் குழந்தையின் தாய் புகார் அளித்துள்ளார். இந்தச் சம்பவம் அப்பகுதியில் அதிர்ச்சியை ஏற்படுத்தியுள்ளது.
விளையாடிக் கொண்டிருந்த குழந்தைக்கு நேர்ந்த கொடூரம்!
கடந்த அக்டோபர் 14-ஆம் தேதி இரவு 9 மணி முதல் 9.30 மணிக்குள், 6-வது மாடியில் உள்ள தங்கள் வீட்டுக்கு வெளியே பொதுவான நடைபாதையில் 18 மாதக் குழந்தை பூனையுடன் விளையாடிக் கொண்டிருந்தது. சிறிது நேரத்தில் குழந்தையைக் காணவில்லை என்பதை உணர்ந்த தாய், தனது 12 வயது மகனை அனுப்பித் தேடச் சொல்லியுள்ளார்.
தங்கையைக் கண்டுபிடிக்க முடியாத சிறுவன், படிக்கட்டுப் பகுதி வழியாகக் கீழே பார்த்தபோது, அடித்தளத்தில் ஒருவர் கிடப்பதைக் கண்டுள்ளான். அணிந்திருந்த ஆடைகளை வைத்து அது தனது தங்கை என்பதை உணர்ந்த அவன், உடனடியாகத் தாயிடம் ஓடிச் சென்று தெரிவித்துள்ளான்.
அதற்குள் குடியிருப்புவாசிகள் காயமடைந்த குழந்தையை மீட்டு மருத்துவமனைக்குக் கொண்டு சென்றனர். ஆனால், குழந்தையைப் பரிசோதித்த மருத்துவர்கள், அது ஏற்கெனவே உயிரிழந்துவிட்டதாகத் தெரிவித்தனர்.
அழைத்து, தூக்கி வீசியதாகத் தாய் புகார்!
குழந்தையின் தாய் அளித்த புகாரின்படி, 6-வது மாடியில் உள்ள பாதுகாப்புத் தடுப்புச் சுவர் சுமார் மூன்றரை அடி உயரம் கொண்டது. எனவே, குழந்தை தானாக நிலைதடுமாறி கீழே விழுந்திருக்க வாய்ப்பில்லை என அவர் தெரிவித்துள்ளார்.
மேலும், குடியிருப்பில் உள்ள சிசிடிவி காட்சிகளைப் போலீஸார் ஆய்வு செய்தபோது, பக்கத்து வீட்டில் வசிக்கும் 10 வயது சிறுமி, குழந்தையைச் சைகை செய்து லிஃப்ட் அருகே அழைத்ததாகக் கூறப்படுகிறது. குழந்தை அருகில் சென்றதும், அதைத் தூக்கி படிக்கட்டுப் பகுதியில் இருந்து கீழே வீசியதாகத் தாய் குற்றம்சாட்டியுள்ளார்.
குழந்தையை வீசிய பிறகு அந்தச் சிறுமி அங்கிருந்து ஓடிவிட்டதாகவும் புகாரில் தெரிவிக்கப்பட்டுள்ளது.
10 வயது சிறுமியிடம் விசாரணை!
சம்பவம் முதலில் விபத்து மரணமாகப் பதிவு செய்யப்பட்டிருந்தது. குழந்தையின் தாய் அளித்த புகாரைத் தொடர்ந்து, சம்பவம் நடந்த நான்கு நாட்களுக்குப் பிறகு, ஞாயிற்றுக்கிழமை தின்டோஷி போலீஸார் 10 வயது சிறுமிக்கு எதிராக முதல் தகவல் அறிக்கையைப் (FIR) பதிவு செய்தனர்.
அந்தச் சிறுமி சிறார் நீதிக் குழுமத்தில் (Juvenile Justice Board) ஆஜர்படுத்தப்பட்டார். அவருக்கு ஆலோசனை வழங்க உத்தரவிட்ட குழுமம், அதற்காகத் தொண்டு நிறுவனம் ஒன்றையும் நியமித்தது. பின்னர் சிறுமி பெற்றோரின் பொறுப்பில் ஒப்படைக்கப்பட்டார். சம்பவத்துக்கு இரண்டு வாரங்களுக்கு முன்புதான் அந்தச் சிறுமியின் குடும்பம் குடியிருப்புக்கு வந்ததாகக் கூறப்படுகிறது. தற்போது அவர்கள் உறவினர் வீட்டுக்குச் சென்றுள்ளதாகத் தகவல்கள் தெரிவிக்கின்றன.
10 வயதுக் குழந்தை மீது கொலை வழக்கு சாத்தியமா?
இந்தியச் சட்டப்படி, 7 வயதுக்குட்பட்ட குழந்தைகளை குற்றவியல் நடவடிக்கைக்கு உட்படுத்த முடியாது. 7 முதல் 12 வயதுக்குட்பட்ட குழந்தைகள், தாங்கள் செய்யும் செயலின் விளைவுகளைப் புரிந்துகொள்ளும் திறன் பெற்றிருந்தார்களா என்பதைப் பொறுத்தே சட்ட நடவடிக்கை அமையும்.
இந்தச் சம்பவத்தில், சிறுமியின் செயல்பாடு மற்றும் அதன் விளைவுகளை அவர் புரிந்துகொண்டாரா என்பது விசாரணை மற்றும் சட்ட நடைமுறைகளில் முக்கியத்துவம் பெறும். சிறுமிக்கு ஆலோசனை மற்றும் மறுவாழ்வு உதவிகள் வழங்கப்பட வேண்டும் என்றும் நிபுணர்கள் வலியுறுத்தியுள்ளனர்.