நவம்பர் 6 முதல் ஆபாசப் படங்களுக்கு புதிய கட்டுப்பாடு… இங்கிலாந்து அரசு அதிரடி!
பெண்களுக்கு எதிரான வன்முறையைத் தூண்டும் ஆபாசப் படங்களைக் கட்டுப்படுத்தும் வகையில், மூன்று வகையான ஆபாசக் காட்சிகளுக்குத் தடை விதிக்க இங்கிலாந்து அரசு முடிவு செய்துள்ளது. இந்தப் புதிய சட்டம் நவம்பர் 6-ம் தேதி முதல் அமலுக்கு வருகிறது.
இதன்படி, கழுத்தை நெரித்தல் அல்லது மூச்சுத்திணறச் செய்தல் போன்ற வன்முறைக் காட்சிகள், உறவினர்களுக்கு இடையிலான பாலியல் உறவுகள் அல்லது உறவினர்கள் போல நடிக்கும் காட்சிகள், 16 வயதுக்குக் குறைவான குழந்தையைப் போல ஒருவர் நடிக்கும் பாலியல் காட்சிகள் ஆகியவற்றைக் கொண்ட ஆபாசப் படங்கள் சட்டவிரோதமாகும்.
பெண்கள் மற்றும் சிறுமிகள் மீது இத்தகைய ஆபாசக் காட்சிகள் ஏற்படுத்தும் பாதிப்புகள் குறித்து பல்வேறு கட்சிகளைச் சேர்ந்த நாடாளுமன்ற உறுப்பினர்கள் வலியுறுத்தியதைத் தொடர்ந்து இந்த நடவடிக்கை எடுக்கப்பட்டுள்ளது. இணையத்தில் வெளியாகும் ஆபாசப் படங்களைக் கட்டுப்படுத்துவதில் உலகின் மிகக் கடுமையான விதிமுறைகளைக் கொண்ட நாடுகளில் ஒன்றாக இங்கிலாந்து மாறும் என்றும் கூறப்படுகிறது.
ஸ்கை நியூஸ் நடத்திய ஆய்வில், பெண்கள் கழுத்தில் சங்கிலி அணிந்திருப்பது போன்றும், அவர்களைச் சங்கிலியால் இழுத்துச் செல்வது போன்றும் சித்தரிக்கும் அதிர்ச்சியளிக்கும் வீடியோக்கள் கண்டறியப்பட்டுள்ளன. மூச்சுவிட முடியாமல் தவிக்கும் பெண்களைக் கேலி செய்யும் வாசகங்களும் அந்த வீடியோக்களில் இடம்பெற்றிருந்தன.
உடலுறவின்போது கழுத்து நெரிக்கப்பட்ட அனுபவத்தைச் சந்தித்த ஒருவர், இத்தகைய வீடியோக்கள் வன்முறையைப் பெருமைப்படுத்துவதாக ஸ்கை நியூஸிடம் தெரிவித்துள்ளார்.
இது குறித்து இங்கிலாந்து நீதித்துறை அமைச்சர் அலெக்ஸ் டேவிஸ்-ஜோன்ஸ் கூறுகையில், “பெண்கள் மற்றும் சிறுமிகளுக்கு எதிரான வன்முறையை அடுத்த 10 ஆண்டுகளில் பாதியாகக் குறைப்பதில் அரசு உறுதியாக உள்ளது. இருப்பினும், தீங்கு விளைவிக்கும் ஆபாசப் படங்களை இணையத்தில் எளிதாகப் பார்க்கும் நிலை இன்னும் உள்ளது” என்றார்.
மேலும், “தீங்கற்ற பாலியல் விருப்பங்களைக் குற்றமாக்குவது எங்கள் நோக்கமல்ல. ஆனால், ஆபாசப் படங்கள் ஆரோக்கியமான உறவு எப்படி இருக்க வேண்டும் என்பது குறித்த மக்களின் எண்ணங்களை, குறிப்பாக இளைஞர்களின் எண்ணங்களைப் பாதிக்கக்கூடும். பெண்களுக்கு எதிரான வன்முறையை இயல்பான ஒன்றாகக் காட்டும் அல்லது அதைப் பெருமைப்படுத்தும் காட்சிகள் ஆபத்தானவை” என்றும் அவர் தெரிவித்தார்.
ஆபாசப் படங்கள் தொடர்பான கட்டுப்பாடுகள் குறித்து 2025-ல் ஆய்வு அறிக்கை அளித்த கன்சர்வேடிவ் கட்சியைச் சேர்ந்த நாடாளுமன்ற மேலவை உறுப்பினர் பரோனஸ் கேபி பெர்டின், இந்த அறிவிப்பு மிகவும் தாமதமாக எடுக்கப்பட்டாலும் வரவேற்கத்தக்கது என்று கூறினார்.
பெண்களின் கழுத்தை நெரிக்கும் காட்சிகளைக் கொண்ட ஆபாசப் படங்கள் நிஜ வாழ்க்கையில் கடுமையான பாதிப்புகளை ஏற்படுத்தக்கூடும் என்றும், உறவினர்களைப் போல நடிக்கும் காட்சிகள் மற்றும் குழந்தைகளைப் போல பெரியவர்கள் நடிக்கும் காட்சிகள் கவலைக்குரியவை என்றும் அவரது அறிக்கை சுட்டிக்காட்டியிருந்தது.
“சட்ட மாற்றத்துடன், விதிமுறைகளைச் சிறப்பாக அமல்படுத்துவதும் கண்காணிப்பை வலுப்படுத்துவதும் அவசியம். வன்முறையைத் தூண்டும் மற்றும் நிஜ வாழ்க்கையில் பாதிப்பை ஏற்படுத்தக்கூடிய ஆபாசக் காட்சிகள் ஏற்றுக்கொள்ள முடியாதவை என்ற தெளிவான செய்தியை, அவற்றை வெளியிடும் நிறுவனங்களுக்கும் ஒட்டுமொத்தச் சமூகத்துக்கும் இந்த நடவடிக்கை தெரிவிக்கும்” என்று அவர் கூறினார்.
இதற்கிடையே, கழுத்தை நெரித்தல் தொடர்பான ஆய்வுகளை மேற்கொள்ளும் Institute for Addressing Strangulation அமைப்பு 2024-ல் நடத்திய ஆய்வில், 16 முதல் 34 வயதுக்குட்பட்டவர்களில் மூன்றில் ஒருவருக்கும் அதிகமானோர், இருவரின் சம்மதத்துடன் நடைபெற்ற பாலியல் உறவின்போது குறைந்தது ஒருமுறையாவது கழுத்து நெரிக்கப்பட்டதாக அல்லது மூச்சுத்திணறலுக்கு உள்ளாக்கப்பட்டதாகத் தெரிவித்துள்ளனர்.
அதே அமைப்பு கடந்த ஆண்டு நடத்திய ஆய்வில், பாலியல் உறவில் ஈடுபட்டிருந்த 16 முதல் 17 வயதுக்குட்பட்ட சிறார்களில் 43 சதவீதம் பேர் இத்தகைய அனுபவத்துக்கு உள்ளானதாகக் கூறியுள்ளனர்.