புதுச்சேரி
பாஜகவின் புதுச்சேரி மாநில தலைவராக வி பி ராமலிங்கம் தேர்வாக உள்ளார்.
புதுச்சேரி பாஜகவின் புதிய தலைவர் தேர்தலுக்கான அறிவிப்பு வெளியிடப்பட்டுள்ள நிலையில் நேற்று நடந்த பாஜக நிர்வாகிகள் கூட்டத்துக்கு மாநில தலைவர் செல்வகணபதி எம்.பி. தலைமை தாங்கினார். கூட்டத்தில் மேலிட பார்வையாளர் நிர்மல்குமார் சுரானா, எம்.எல்.ஏ.க்கள் சாய்.சரவணன்குமார், கல்யாணசுந்தரம், ஜான்குமார், முன்னாள் எம்.எல்.ஏ.க்கள் வி.பி.ராமலிங்கம், வெங்கடேசன், அசோக்பாபு, தீப்பாய்ந்தான் உள்பட பலர் கலந்துகொண்டனர்.
இந்த கூட்டத்தில் புதிய தலைவர் தேர்வு தொடர்பான விவாதங்கள் நடந்தபோது கட்சி ஒற்றுமை, மேலிட ஆலோசனையை கருத்தில் கொண்டு கட்டுப்பாடுடன் செயல்படுவது என்று முடிவு எடுக்கப்பட்டது. அதன்படி முன்னாள் எம்.எல்.ஏ. வி.பி.ராமலிங்கத்தை தலைவராக தேர்வு செய்ய அதிக அளவில் நிர்வாகிகள் ஆதரவளித்ததாக கூறப்பட்டது.
பா.ஜனதா தலைவர் பதவிக்கான வேட்புமனு தாக்கல் இன்று (ஞாயிற்றுக்கிழமை) நடைபெற்ற நிலையில் வி.பி.ராமலிங்கம் வேட்புமனு தாக்கல் செய்தார். மாநில பாஜக தலைவர் பதவிக்கு அவர் ஒருவர் மட்டுமே மனு தாக்கல் செய்த நிலையில் வி.பி.ராமலிங்கம் போட்டியின்றி தேர்வு செய்யப்பட்டார்.
