நீட் தேர்வு விவகாரத்தில் அதிமுக போல் மக்களை ஏமாற்ற மாட்டோம் – அமைச்சர் உதயநிதி

சென்னை:
நீட் தேர்வை ரத்து செய்யும் முழு பொறுப்பையும் நான் உணர்கிறேன் என அமைச்சர் உதயநிதி ஸ்டாலின் கூறியுள்ளார்.

சென்னையில் இன்று தமிழக விளையாட்டு துறை அமைச்சர் உதயநிதி ஸ்டாலின் செய்தியாளர்களை சந்தித்தார். அப்போது அவரிடம் நீட் தேர்வு விலக்கு குறித்தும், திமுக தேர்தல் அறிக்கையில் கொடுக்கப்பட்ட வாக்குறுதி குறித்தும் செய்தியாளர்கள் கேள்வி எழுப்பினர். அப்போது அமைச்சர் உதயநிதி ஸ்டாலின் கூறியதாவது: நீட் தேர்வு விவகாரத்தில் அதிமுக போல் மக்களை ஏமாற்ற மாட்டோம். நீட் தொடர்பாக கொடுத்த வாக்குறுதியை காப்பாற்ற நடவடிக்கை எடுப்பேன். மக்களை ஏமாற்ற மாட்டேன். நீட் தேர்வை ரத்து செய்யும் முழு பொறுப்பையும் நான் உணர்கிறேன்.

வருகிற ஆகஸ்ட் 20ம் தேதி மாவட்ட தலைநகரங்களில் திமுக சார்பில் நடைபெறவுள்ள நீட் தேர்வுக்கு எதிரான திமுக போராட்டத்தில் அமைச்சர்களும் கலந்துகொள்வார்கள். மாணவர்கள், பெற்றோர்கள், ஆசிரியர்கள் என எல்லோரும் நீட் தேர்வுக்கு எதிரான திமுக உண்ணாவிரத போராட்டத்தில் கலந்துகொள்ள வேண்டும். 2021ம் ஆண்டு சட்டமன்ற தேர்தலின் போது திமுக கொடுத்த வாக்குறுதியின் படி நீட் தேர்வில் இருந்து விலக்கு பெற அனைத்து நடவடிக்கைகளையும் எடுப்பேன். இவ்வாறு கூறினார்.