சென்னை: காலம் விசித்திரமானது என மறைந்த கருணாநிதியுடன் தான் இருந்த சிறுவயது புகைப்படத்தை வெளியிட்டு நினைவு கூர்ந்துள்ளார் தமிழ்நாடு தொழில்துறை அமைச்சர் தங்கம் தென்னரசு.
தமிழ்நாட்டின் தொழில்துறை அமைச்சராக பொறுப்பு வகிப்பவர் தங்கம் தென்னரசு. இவரது தந்தை தங்கபாண்டியன் முன்னாள் திமுக அமைச்சர். தங்கம் தென்னரசு இதுவரை 3 முறை சட்டப்பேரவைதேர்தலில் போட்டியிட்டு வெற்றி பெற்றுள்ளார். 1998 முதல் 2001 வரை அருப்புக்கோட்டை சட்டப்பேரவை உறுப்பினராக இருந்தார். 2006 இல் அருப்புக்கோட்டை தொகுதியில் வெற்றி பெற்று தமிழக பள்ளிக் கல்வித் துறை அமைச்சராகப் பதவி வகித்தாா். கடந்த 2011, 2016 தோ்தலில் திருச்சுழி தொகுதியில் திமுக சாா்பில் வெற்றி பெற்று சட்டப்பேரவை உறுப்பினராகத் தோ்வு செய்யப்பட்டுள்ளாா். கடந்த 2017 முதல் வடக்கு மாவட்ட திமுக செயலா் பதவியும் வகித்து வருகிறாா். தற்போது தமிழ்நாட்டின் தொழிற்துறை அமைச்சராக முதல்வர் ஸ்டாலின் தலைமையில் பணியாற்றி வருகிறார்.
இவர் தான் சிறுவயதில், மறைந்த முன்னாள் முதல்வர் கருணாநிதி, முன்னாள் அமைச்சருடன் இடம்பெற்றிருந்த புகைப்படத்துடன் டிவிட் பதிவிட்டுஉள்ளார். அதில்,
காலம் விசித்திரமானது…
தன் போக்கில் சிலவற்றை அதுவே தீர்மானிக்கிறது.
இந்தப் படத்தில் இருக்கும் மூவரின் பொறுப்பிலும் ஏதோ ஒரு காலகட்டத்தில் தமிழ் நாட்டின் தொழில் துறை அமைச்சகம் வந்திருக்கின்றது.
முத்தமிழறிஞர் கலைஞர் மற்றும் முன்னாள் அமைச்சர் மாதவன் ஆகியோருடன் 1975 ம் ஆண்டில்.
இவ்வாறு தனது மலரும் நினைவுகளை வெளியிட்டு உள்ளார்.
மேலே உள்ள புகைப்படத்தில் உள்ள 3 பேரும் தமிழ்நாட்டின் தொழிற்துறை அமைச்சராக பணியாற்றியவர்கள் என்பது குறிப்பிடத்தக்கது.