சென்னை: சென்னையில் கடந்த 3நாளில் 1,221 பேர் தபால் ஓட்டு போட்டுள்ளனர் என்றும், ரூ.20கோடி பறிமுதல் செய்யப்பட்டுள்ள என சென்னை தேர்தல் அதிகாரியும், மாநகராட்சி ஆணையருமான பிரகாஷ் தெரிவித்துள்ளார்.
தமிழகத்தில் ஏப்ரல் 6ந்தேதி சட்டமன்ற தேர்தல் வாக்குப்பதிவு நடைபெற உள்ளது. முன்னதாக தபால் வாக்குப்பதிவு மார்ச் 26ந்தேதி முதல் நடைபெற்று வருகிறது. இந்த நிலையில், அனைத்து அங்கீகரிக்கப்பட்ட அரசியல் கட்சிகளுடனான ஆலோசனை கூட்டம் மாவட்ட தேர்தல் அதிகாரி ஜி.பிரகாஷ் தலைமையில் சென்னை அம்மா மாளிகையில் நேற்று நடந்தது.
பின்னர் செய்தியாளர்களை சந்தித்தவர், சென்னையில் பதற்றமான வாக்குச்சாவடிகளில் அடிப்படை பாதுகாப்பு வழங்க ஏற்பாடு செய்யப்பட்டுள்ளது. தேர்தலைப் பொறுத்தவரை ஒரு தொகுதியில் 16 வேட்பாளர்களுக்கு மேல் இருந்தால் கூடுதல் வாக்குப்பதிவு எந்திரங்கள் வைக்கப்படும். கூடுதல் வேட்பாளர்கள் உள்ளதால், 7 ஆயிரத்து 181 துணை வாக்குப்பதிவு எந்திரங்களும், 537 விவிபேட் எந்திரங்களும் குலுக்கல் முறையில் தொகுதிக்கு ஒதுக்கும் முறை நடந்து முடிந்தது. இவை 31-ந்தேதிக்குள் அந்தந்த சட்டமன்றத் தொகுதிகளுக்குப் பிரித்து அனுப்பப்படும்.
சென்னையில் (28ந்தேதி வரை) 1182 முதியோர்கள், 39 மாற்றுத்திறனாளிகள் என 1221 பேர் தபால் ஓட்டு அளித்துள்ளனர். தேர்தல் பறக்கும் படை மூலம் ஏறக்குறைய ரூ.20 கோடி மதிப்பிலான பணம், பொருட்கள் பறிமுதல் செய்யப்பட்டுள்ளன. சென்னையில் கண்காணிப்பு மற்றும் சோதனை தீவிரப்படுத்தப்பட்டு வருகிறது. இதற்காக கூடுதல் போலீசார் நியமிக்கப்பட்டுள்ளனர்.
சென்னையில் தேர்தல் தொடர்பாக இதுவரை 316 புகார்கள் வந்துள்ளன. 312 புகார்கள் மீது நடவடிக்கை எடுக்கப்பட்டுள்ளது. 4 புகார்கள் மீது வழக்குப்பதிவு செய்யப்பட்டுள்ளது. கூட்டம், பிரசாரம் நடத்துவதற்கு அனுமதி கேட்டு 3 ஆயிரத்து 258 விண்ணப்பங்கள் வந்துள்ளன. அதில் 2 ஆயிரத்து 89 விண்ணப்பங்களுக்கு அனுமதி கொடுக்கப்பட்டுள்ளது. 648 விண்ணப்பங்கள் நிராகரிக்கப்பட்டுள்ளன. 413 விண்ணப்பங்கள் பரிசீலனையில் உள்ளன. 108 விண்ணப்பங்கள் அனுமதி பெற்று ரத்து செய்யப்பட்டுள்ளன.
கொளத்தூர் சட்டமன்றத் தொகுதியில் 36 வேட்பாளர்கள் போட்டியிடுவதால், அந்த தொகுதியில் மட்டும் அதிக வாக்குப்பதிவு எந்திரங்கள் வைக்கப்படுகின்றன. அந்தவகையில் அங்கு 3 எந்திரங்கள் பயன்படுத்தப்படுகின்றன. தியாகராயநகரில் குறைவான வேட்பாளர்கள் உள்ளதால், அங்கு ஒரு வாக்குப்பதிவு எந்திரம் வைக்கப்படுகிறது.
துறைமுகம் தொகுதியில் ரூ.7 கோடியே 77 லட்சம் வரையிலும், அண்ணாநகர் தொகுதியில் ரூ.5 கோடியே 31 லட்சம் வரையிலும், வேளச்சேரியில் ரூ.5 கோடியே 50 லட்சம் வரையிலும் பணம், பொருட்கள் தேர்தல் பறக்கும் படையினரால் பறிமுதல் செய்யப்பட்டுள்ளன.
இவ்வாறு அவர் கூறினார்.
சென்னையில் உள்ள 16 தொகுதிகளில் இந்த தபால் வாக்கு பதிவு செய்யப்பட உள்ள நிலையில், 15 தபால் ஓட்டுக்களுக்கு ஒரு குழு நியமனம் செய்யப்பட்டுள்ளது. இந்த தபால் வாக்கு மார்ச் 31 ஆம் தேதி வரை பதிவு செய்யப்படுகிறது. தபால் வாக்கு பதிவு செய்ய 7,300 பேருக்கு அனுமதி அளிக்கப்பட்டுள்ளது குறிப்பிடத்தக்கது.