சென்னை
கங்கனா ரணாவத் நடித்து இயக்கும் எமெர்ஜென்சி திரைப்படத்துக்கு யு/ஏ சான்றிதழ் தரப்பட்டுள்ளது.
மறைந்த பிரதமர் இந்திரா காந்தி, நாடு முழுவதும் அமல்படுத்திய அவசரநிலை பிரகடனத்தை மையமாக வைத்து உருவாகி இருக்கும் ‘எமர்ஜென்சி’ படத்தில், இந்திரா காந்தியாக கங்கனா ரனாவத் நடித்துள்ளார். அவர படத்தை இயக்கியும் உள்ளார். ஜி.வி.பிரகாஷ் இசையமைத்துள்ள இப்படத்தின் திரைக்கதை மற்றும் வசனத்தை ரித்தேஷ் ஷா எழுதியுள்ளார்.
இப்படத்தின் படப்பிடிப்பு கடந்த ஆண்டே நிறைவடைந்த நிலையில், சில குறிப்பிட்ட காரணங்களால் படத்தின் ரிலீஸ் தேதி தள்ளிவைக்கப்பட்டது. பிறகு கடந்த 6-ந் தேதி வெளியாகும் என படக்குழு அறிவித்தது. ஆயினும் இந்தப் படத்தின் ரிலீஸ் தேதி தள்ளிப்போனது.
சீக்கிய சமூகத்தினரைத் தவறாக சித்தரித்துள்ளதாக எழுந்த சர்சையைத் தொடர்ந்து இப்படத்திற்கு தணிக்கை சான்றிதழ் வழங்கப்படாமல் இருந்தது. படத்தில் உள்ள சர்ச்சைக்குரிய பகுதிகள் குறிப்பிட்ட சமூகத்தினரின் உணர்வுகளைப் புண்படுத்துவதாக அமைந்துள்ளதால் அக்காட்சிகளை நீக்க தணிக்கை குழு உத்தரவிட்டிருந்தது.
தற்போது இந்த படத்திற்கு தணிக்கை குழு யு/ஏ சான்றிதழை வழங்கியுள்ளது. இந்த படத்திற்கான ரிலீஸ் தேதி இன்னும் அதிகாரப்பூர்வமாக அறிவிக்கப்படவில்லை. இது குறித்து விரைவில் அறிவிப்பு வெளியாகும் என்று எதிர்பார்க்கப்படுகிறது.