இன்று முதல்வர் முக ஸ்டாலின் தூத்துக்குடி பயணம்

சென்னை

தமிழக முதல்வர் மு க ஸ்டாலின் இன்று தூத்துக்குடிக்கு செல்கிறார்.

இன்று பல்வேறு நிகழ்ச்சிகளில் கலந்து கொள்வதற்காக தி.மு.க. தலைவரும், முதல்வருமான மு.க.ஸ்டாலின் தூத்துக்குடி செல்கிறார். இதையொட்டி இன்று மதியம் சென்னையில் இருந்து விமானத்தில் புறப்பட்டு வாகைகுளம் விமான நிலையத்துக்கு வருகிறார்.

மாலை 4.30 மணிக்கு முதல்வர் தூத்துக்குடி- திருச்செந்தூர் ரோடு சத்யாநகர் பகுதியில் புதிதாக கட்டப்பட்ட நியோ டைடல் பார்க்கை திறந்து வைக்கிறார். இதைத் தொடர்ந்து மாலை 5 மணிக்கு மாணிக்கம் மஹாலில் தூத்துக்குடி வடக்கு, தெற்கு மாவட்ட கழக நிர்வாகிகளுடன் சந்திப்பு நிகழ்ச்சியில் பங்கேற்று நிகழ்ச்சி முடிந்ததும் இரவில் தூத்துக்குடி சத்யா ரிசார்ட்சில் முதல்வர் தங்கி ஓய்வெடுக்கிறார்.

நாளைக் காலை 9 மணிக்கு தூத்துக்குடி காமராஜ் கல்லூரிக்கு சென்ற முதல்வர் மு.க.ஸ்டாலின் அங்கு தொடங்கி வைக்கும் தமிழக அரசின் புதுமைப்பெண் விரிவாக்க திட்டம் மூலம் தமிழகம் முழுவதும் அரசு உதவிபெறும் பள்ளிகளில் 6 முதல் 12-ம் வகுப்பு வரை படித்து உயர்கல்வியில் சேர்ந்துள்ள 75 ஆயிரத்து 28 மாணவிகள் பயன்பெறுவர்.

முதல்வரின் வருகையை முன்னிட்டு தூத்துக்குடியில் பலத்த காவல்துறை பாதுகாப்பு போடப்பட்டுள்ளது. பிரதான சாலைகளின் இருபுறமும் தி.மு.க. கொடிகள் பறக்க விடப்பட்டு உள்ளன. காமராஜ் கல்லூரியில் பிரமாண்ட பந்தல் மற்றும் கல்லூரி முன்பாக அலங்கார வளைவு, தோரணம் அமைக்கப்பட்டு உள்ளது.