சென்னை: கோடை விடுமுறையையொட்டி, பொதுமக்களின் வசதிக்காக தெற்கு ரயில்வே சென்னையில் இருந்து வேளாங்கண்ணிக்கு வாராந்திர சிறப்பு விரைவு ரயில் அறிவித்து உள்ளது. இந்த ரயில், மே17-ம் தேதி முதல் ஜூன் 30-ம் தேதி வரை இயக்கப்பட இருப்பதாக அறிவிக்கப்பட்டுள்ளது.
கோடை விடுமுறையையொட்டி, சுற்றுலா ஸ்தலங்கள் மற்றும் ஆன்மிக ஸ்தலங்களுக்கு செல்லும் சுற்றுலா பயணிகளின் வசதிக்காக, கூட்ட நெரிசலை தவிர்க்கும் வகையில் ரயில்வே துறை பல்வேறு சிறப்பு ரயில்களை இயக்கி வருகிறது. அந்த வகையில், சென்னை எழும்பூரில் இருந்து வேளாங்கண்ணிக்கு மே 17-ம் தேதி முதல் ஜூன் 30-ம் தேதி வரை வெள்ளிக்கிழமை மற்றும் ஞாயிற்றுக்கிழமைகளில் விரைவு ரயில் (06037) இயக்கப்படவுள்ளது.
இந்த ரயில் சென்னையில் இருந்து இரவு 11.50 மணிக்கு புறப்பட்டு வேளாங்கண்ணிக்கு மறுநாள் காலை 8.30 மணிக்கு சென்றடையும். வெள்ளிக்கிழமை மற்றும் ஞாயிற்றுக்கிழமைகளில் இந்த ரயில் இயக்கப்படுகிறது.
மறு மார்க்கத்தில் வேளாங்கண்ணியில் இருந்து சென்னை எழும்பூருக்கு மே 18-ந் தேதி முதல் ஜூலை 1-ம் தேதி வரை சனிக்கிழமை மற்றும் திங்கட்கிழமைகளில் விரைவு ரயில் (06038) இயக்கப்படவுள்ளது.
இந்த ரயில் வேளாங்கண்ணியில் இருந்து பிற்பகல் 2.45 மணிக்கு புறப்பட்டு சென்னைக்கு இரவு 11.30 மணிக்கு வந்து சேரும். தாம்பரம், செங்கல்பட்டு, மேல்மருவத்தூர், விழுப்புரம், பண்ருட்டி, திருப்பாப்புலியூர், கடலூர் போர்ட், சிதம்பரம், சீர்காழி, வைத்தீஸ்வரன் கோவில், மயிலாடுதுறை, பேரளம், திருவாரூர், நாகப்பட்டினம் ஆகிய ரயில் நிலையங்களில் இந்த சிறப்பு ரயில்கள் நின்று செல்லும் என்று தெற்கு ரயில்வே திருச்சி கோட்டம் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.