சென்னை: பொதுமக்களுக்கு அதிர்ச்சியளிக்கும் செய்தியாக, மே 1ந்தேதி முதல் நாடு முழுவதும் ஏடிஎம் கட்டணம் உயர்த்தப்படுவதாக மத்தியஅரசு உத்தரவிட்டு உள்ளது.
ஏடிஎம் மூலம் பணம் எடுக்கும் கட்டணங்கள் மே 1, 2025 முதல் உயரும் என இந்திய ரிசர்வ் வங்கி அறிவித்து உள்ளது. ஏற்கனவே டிஜிட்டல் பண பரிவர்த்தனை கட்டணங்களும் உயர்த்தப்படுவதாக அறிவித்துள்ள நிலையில், அடுத்த பேரிடியாக, ஏடிஎம் கட்டணத்தையும் உயர்த்த முடிவு செய்யப்பட்டு உள்ளது. அதன்படி, இந்திய ரிசர்வ் வங்கி ஏடிஎம் மூலம் பணம் எடுப்பதற்கான கட்டணத்தை 3 ரூபாயிலிருந்து 23 ரூபாயாக உயர்த்த வங்கிகளுக்கு உத்தரவிட்டுள்ளது. இந்த புதிய ஏடிஎம் இலவச வரம்புகள் முடிந்த பிறகு ஒவ்வொரு ஏடிஎம் பரிவர்த்தணைகளுக்கும் 23 ரூபாய் கட்டணம் வசூலிக்கப்படும் என அறிவிக்கப்பட்டு உள்ளது.
அதாவது, தற்போது வங்கி வாடிக்கையாளர்கள் மாதம்தோறும் 5 முறை ஏடிஎம்-ல் இலவசமாக பணம் எடுக்கலாம். 5முறைக்கு மேல் ஏடிஎம் சேவையை பயன்படுத்துவதற்கு, ரூ.21 கட்டணம் வசூலிக்கப்படுகிறது. இந்த கட்டணத்தை மே 1ஆம் தேதி முதல் 23 ரூபாயாக அதிகரிக்க, ரிசர்வ் வங்கி மற்ற வங்கிகளுக்கு அனுமதி அளித்துள்ளது.
மெட்ரோ நகரங்களில் ஒரு மாதத்தில் அதிகபட்சம் 3 இலவச பரிவர்த்தனைகளையும், மெட்ரோ அல்லாத நகரங்களில் அதிகபட்சம் 5 இலவச பணம் எடுக்கலாம். இலவச பரிவர்த்தனைகளின் வரம்பைத் தாண்டிய பிறகு, ஒவ்வொரு பரிவர்த்தனைக்கும் நீங்கள் ரூ.23 கட்டணம் செலுத்த வேண்டும்.
வாடிக்கையாளர்கள் தாங்கள் கணக்கு வைக்காத பிற வங்கி ஏடிஎம்களை, பெருநகரங்களில் 3 முறைக்கு அதிகமாகவும், பிற பகுதிகளில் 5 முறைக்கு அதிகமாகவும் பயன்படுத்த, ரூ.23 கட்டணம் வசூலிக்கப்படும் என அறிவிக்கப்பட்டுள்ளது.
இந்த ஏடிஎம் கட்டண உயர்விற்குபின் பல முக்கிய காரணங்கள் உள்ளன. ஏனெனில் வங்கிகள் ஏடிஎம் பயன்பாட்டிற்கு செலவுகளை செய்கின்றன. நீங்கள் வேறொரு வங்கியின் ஏடிஎம்மில் இருந்து பணம் எடுக்கும்போது, பயன்படுத்தப்பட்ட சேவைக்கு உங்கள் வங்கி மற்ற வங்கிக்கு பணம் செலுத்துகிறது.