விழுப்புரம்
நடிகர் விஜய்யின் தவெக மற்றும் வேல்முருகனின் தவாக ஆகிய கட்சிகள் இடையே போஸ்டர் யுத்தம் கடுமையாகி உள்ளது.
அண்மையில் தமிழக வெற்றிக் கழகம் சார்பில் அரசு பொதுத்தேர்வுகளில் சாதித்த மாணவ, மாணவிகளுக்கு அக்கட்சி தலைவர் நடிகர் விஜய் பரிசுகளை வழங்கி பாராட்டும் நிகழ்ச்சி நடைபெற்றது. விஜய் நடத்திய அந்த நிகழ்ச்சியில் ஹார்டின், அம்பு விடுவது போன்ற நிகழ்ச்சிகள் இடம் பெற்றிருந்ததை தமிழக வாழ்வுரிமை கட்சியின் தலைவர் வேல்முருகன் விமர்சித்து பேசியிருந்தார். எனவே இரு கட்சி நிர்வாகிகளிடையே போஸ்டர் மோதல் ஏற்பட்டு பரபரப்பை ஏற்படுத்தியுள்ளது.
வேல்முருகனின் தமிழக வாழ்வுரிமை கட்சி சார்பில் பல்வேறு முக்கிய இடங்களில் ஒட்டப்பட்டுள்ள போஸ்டரில்,
“தமிழர்களின் பாரம்பரிய கலாச்சாரத்தை சீரழிக்கும் விதமாக பெண்களின் மீதும், மாணவிகளின் மீதும் கை வைத்து தொட்டு பேசுவது தமிழர்களின் பண்பாட்டுக்கும் கலாச்சாரத்துக்கும் ஏற்புடையது அல்ல. ஆகவே அதுபோல் நடந்து கொண்டு சினிமா மாயயை வைத்து ஆட்சி கட்டிலில் உட்கார்ந்துவிடலாம் என்ற கனவு கண்டிருக்கும் தமிழக வெற்றி கழக தலைவரை கண்டிக்கிறோம்”
என்று குறிப்பிட்டுள்ளனர்.
தெற்கு மாவட்ட தமிழக வெற்றிக் கழகம் சார்பில் ஒட்டப்பட்டுள்ள போஸ்டரில்
“ஒரு சட்டமன்ற உறுப்பினர் சீட்டுக்காக தமிழக மாணவ, மாணவிகளையும், பெற்றோர்களையும் தரக்குறைவாகவும், கீழ்த்தரமாகவும் பேசிய வேல்முருகனை கண்டிக்கிறோம் “
என்று பதிலடி கொடுத்துள்ளனர்.
இதுபோல விழுப்புரம் நகரில் முக்கிய இடங்களில் இரு கட்சிகளும் தலைவர்களை கண்டித்து மாறி மாறி போஸ்டர் ஒட்டியுள்ளது பரபரப்பை ஏற்படுத்தி உள்ளது.
