சத்தீஸ்கரில் பரபரப்பு : சீல் பிரிக்காமலேயே பி.எஸ்சி. தேர்வுத்தாள் கசிவு… உறைக்குள் எண்டோஸ்கோபிக் கேமராவை செலுத்தி ‘காப்பி’…

சத்தீஸ்கர் மாநிலம் ராய்ப்பூரில் உள்ள இந்திரா காந்தி கிருஷி விஸ்வவித்யாலயாவில் (IGKV) பி.எஸ்சி. வேளாண்மை படிப்புக்கான தேர்வுத்தாள் கசிந்த விவகாரத்தில், அதிர்ச்சி அளிக்கும் தகவல்கள் வெளியாகியுள்ளன.

சீல் வைக்கப்பட்ட கேள்வித்தாள் உறையை திறக்காமலேயே, அதற்குள் சிறிய அளவிலான எண்டோஸ்கோபிக் கேமராவை செலுத்தி கேள்வித்தாளை படம் எடுத்ததாக போலீசார் தெரிவித்துள்ளனர்.

மனித உடலில் உள்ள குறுகிய மற்றும் எளிதில் பார்க்க முடியாத பகுதிகளைப் பார்ப்பதற்கு பொதுவாக பயன்படுத்தப்படும் எண்டோஸ்கோபிக் கேமரா, இந்த சம்பவத்தில் கேள்வித்தாள் கசிவுக்கு பயன்படுத்தப்பட்டதாக கூறப்படுகிறது.

போலீசார் பதிவு செய்துள்ள முதல் தகவல் அறிக்கையின்படி, இந்த வழக்கில் முக்கிய குற்றவாளியாக கருதப்படும் துர்க் நகர தனியார் கல்லூரி பேராசிரியர் யோகேஷ் சோன்கேசரியா, சீல் வைக்கப்பட்டிருந்த என்டமாலஜி தேர்வுக் கேள்வித்தாள் உறையை வீட்டுக்கு எடுத்துச் சென்றுள்ளார்.

அவர் ஊசி மற்றும் கூர்மையான கருவி மூலம் உறையில் மிகச்சிறிய துளையை ஏற்படுத்தி, சுமார் ரூ.2,500 மதிப்புள்ள எண்டோஸ்கோபிக் கேமராவை அந்த துளை வழியாக உள்ளே செலுத்தியதாக போலீசார் கூறுகின்றனர்.

அந்த கேமரா மூலம் உறைக்குள் இருந்த கேள்வித்தாளை படம் எடுத்துள்ளார். பின்னர் அந்த வீடியோவைப் பார்த்து கேள்விகளை மீண்டும் தயாரித்து, மாணவர்களுக்கு விற்பனை செய்ததாகவும், அதன் பின்னர் மாணவர்கள் மூலம் வாட்ஸ்அப் மற்றும் சமூக வலைதளங்களில் கேள்வித்தாள் பரவியதாகவும் போலீசார் தெரிவித்துள்ளனர்.

தேர்வுக்கு 2 மணி நேரத்துக்கு முன்பு பரவியது

ஆகஸ்ட் 20-ம் தேதி நடைபெற இருந்த என்டமாலஜி தேர்வுக்கு சுமார் 2 மணி நேரத்துக்கு முன்பே கேள்வித்தாள் வாட்ஸ்அப்பில் பரவத் தொடங்கியது.

காலை 8.41 மணிக்கு கவார்தா வேளாண் கல்லூரிக்கு கேள்வித்தாள் கசிந்த தகவல் கிடைத்தது. தொடர்ந்து காலை 8.54 மணியளவில் பல்கலைக்கழக அதிகாரிகளுக்கும் தகவல் தெரிவிக்கப்பட்டது.

மாணவர்கள் மற்றும் அவர்களின் பிரதிநிதிகளும் வாட்ஸ்அப்பில் கேள்வித்தாளின் சில பகுதிகள் பரவி வருவதாக பல்கலைக்கழக நிர்வாகத்திடம் தெரிவித்தனர்.

தேர்வு மையங்களில் வழங்கப்பட்ட கேள்வித்தாளையும், வாட்ஸ்அப்பில் பரவிய கேள்வித்தாளையும் ஒப்பிட்டபோது இரண்டும் ஒரே மாதிரியாக இருந்தது தெரியவந்தது. இதையடுத்து தேர்வு ரத்து செய்யப்பட்டு, செப்டம்பர் முதல் வாரத்தில் மீண்டும் நடத்த முடிவு செய்யப்பட்டுள்ளது.

இந்தத் தேர்வை 27 வேளாண் கல்லூரிகளைச் சேர்ந்த சுமார் 1,200 மாணவர்கள் எழுத இருந்தனர்.

6 பேர் கைது

இந்த வழக்கில் இதுவரை 6 பேர் கைது செய்யப்பட்டுள்ளனர். அவர்களில் யோகேஷ் சோன்கேசரியா மற்றும் கேள்வித்தாளை தலா ரூ.12,000 கொடுத்து வாங்கியதாக கூறப்படும் 5 மாணவர்களும் அடங்குவர்.

இந்த விவகாரத்தில் மேலும் 2 பேர் தலைமறைவாக இருப்பதாகவும், அவர்களை போலீசார் தேடி வருவதாகவும் தெரிவிக்கப்பட்டுள்ளது.

ராய்ப்பூர் போலீஸ் கமிஷனர் சஞ்சீவ் சுக்லா தலைமையில் 100-க்கும் மேற்பட்ட போலீசார் விசாரணையில் ஈடுபடுத்தப்பட்டனர். சைபர் கிரைம் குழுவினரும் விசாரணையில் இணைந்தனர்.

வாட்ஸ்அப் உரையாடல்கள், சமூக வலைதள பதிவுகள், செல்போன் எண்கள், டிஜிட்டல் தொடர்புகள் மற்றும் செல்போன் இருப்பிடத் தகவல்கள் உள்ளிட்டவற்றை போலீசார் ஆய்வு செய்து வருகின்றனர்.

கேள்வித்தாள் கசிவின் முக்கிய ஆதாரம் 36 மணி நேரத்துக்குள் கண்டுபிடிக்கப்பட்டு, 6 பேர் கைது செய்யப்பட்டதாக போலீசார் தெரிவித்துள்ளனர். இதுவரை 16-க்கும் மேற்பட்டோரிடம் விசாரணை நடத்தப்பட்டுள்ளது.

முழு கசிவு சங்கிலியை கண்டறிய விசாரணை

சீல் வைக்கப்பட்ட கேள்வித்தாள் எங்கிருந்து வெளியே எடுக்கப்பட்டது, அதை முதலில் யார் கேமரா மூலம் படம் எடுத்தது, அந்தப் படங்கள் எவ்வாறு அனுப்பப்பட்டன, யாரிடம் முதலில் சென்றன, பின்னர் எத்தனை மாணவர்களுக்கு பரப்பப்பட்டன என்பது குறித்து போலீசார் விசாரித்து வருகின்றனர்.

இந்த சம்பவத்தில் கைது செய்யப்பட்ட 6 பேருக்கும் பின்னால் மேலும் பெரிய கும்பல் செயல்பட்டதா என்பதையும் போலீசார் ஆய்வு செய்து வருகின்றனர்.

சத்தீஸ்கர் முதல்வர் விஷ்ணு தேவ் சாய், இந்த விவகாரத்தில் கடுமையான மற்றும் நேர்மையான விசாரணை நடத்த உத்தரவிட்டுள்ளார். கேள்வித்தாள் தயாரிப்பு, அச்சிடுதல், சேமித்து வைத்தல், எடுத்துச் செல்லுதல் மற்றும் தேர்வு மையங்களில் பாதுகாப்பாக வைப்பது வரை அனைத்து நடைமுறைகளையும் ஆய்வு செய்ய அரசு உத்தரவிட்டுள்ளது.

தேர்வுகளின் நம்பகத்தன்மையை பாதிக்கும் எந்த முயற்சியையும் பொறுத்துக்கொள்ள முடியாது என்றும், கேள்வித்தாள் தயாரிக்கப்பட்ட இடத்திலிருந்து அது மாணவர்களிடம் சென்றது வரை முழு தொடர்புச் சங்கிலியையும் கண்டறிய வேண்டும் என்றும் முதல்வர் தெரிவித்துள்ளார்.

மற்றொரு தேர்வுத்தாளும் கசிந்ததா?

ஆகஸ்ட் 20-ம் தேதி நடைபெற்றிருக்க வேண்டிய என்டமாலஜி தேர்வுத்தாள் மட்டுமின்றி, ஆகஸ்ட் மாத தொடக்கத்தில் நடைபெற இருந்த பி.எஸ்சி. வேளாண்மை முதலாம் ஆண்டு தாவர நோயியல் தேர்வுக்கான கேள்வித்தாளும் கசிந்திருக்கலாம் என்ற சந்தேகமும் போலீசாருக்கு ஏற்பட்டுள்ளது.

இதுகுறித்தும் தற்போது விசாரணை நடைபெற்று வருகிறது.

கேள்வித்தாள் கசிவின் செயல்முறை:

• சீல் வைக்கப்பட்ட உறையில் ஊசி மூலம் மிகச்சிறிய துளை போடப்பட்டது.
• அந்த துளை வழியாக எண்டோஸ்கோபிக் கேமரா செலுத்தப்பட்டது.
• கேள்வித்தாள் கேமரா மூலம் படம் எடுக்கப்பட்டது.
• அதிலிருந்து கேள்விகள் மீண்டும் தயாரிக்கப்பட்டன.
• கேள்வித்தாள் மாணவர்களுக்கு விற்பனை செய்யப்பட்டது.
• பின்னர் வாட்ஸ்அப் மற்றும் சமூக வலைதளங்கள் மூலம் பலருக்கும் பரப்பப்பட்டது.