மும்பை
பிரபல இந்தி நடிகர் சஞ்சய் தத் தாம் எந்த அரசியல் கட்சியிலும் சேரப்போவதில்லை என அறிவித்துள்ளார்.
இந்தி திரை உலகில் முன்னணி நடிகராக இருக்கும் சஞ்சய்தத் கன்னடத்தில் தயாராகி பான் இந்தியா படமாக வெளியான கே.ஜி.எப் படத்தில் வில்லனாக வந்தார். மேலும் தமிழில் லியோ படத்தில் விஜய்க்கு வில்லனாக நடித்து இருந்தார்.
நடிகர் சஞ்சய்தத் தந்தையான நடிகர் சுனில்தத் மத்திய அமைச்சராகப் பதவி வகித்தவர் ஆவார், சமீபத்தில் சஞ்சய்தத் காங்கிரஸ் கட்சியில் இணைந்து அரியானா மாநில சட்டமன்றத் தேர்தலில் போட்டியிட இருப்பதாகத் தகவல்கள் பரவின.
சஞ்சய்தத் வலைத்தளத்தில் வெளியிட்டுள்ள பதிவில்,
”நான் அரசியல் கட்சியில் சேரப்போவதாக வதந்திகள் பரவி உள்ளன. அதற்குத் தற்போது முற்றுப்புள்ளி வைக்கிறேன். நான் எந்தக் கட்சியிலும் சேரமாட்டேன். தேர்தலிலும் போட்டியிடவில்லை. அரசியலுக்கு வருவதாக இருந்தால் முதலில் நானே அதனை அறிவித்து விடுவேன். எனவே நான் அரசியலுக்கு வருவதாக வெளியாகும் தகவல்களை நம்பவேண்டாம்”
என்று கூறியுள்ளார்.