சென்னை: பாமகவில் தந்தை மகனுக்கு இடையே கட்சியை யார் கைப்பற்றுவது என்ற மோதலின் ஒரு பகுதியாக, ராமதாசின் பொதுக்குழு அறிவிப்புக்கு எதிராக, அன்புமணி தரப்பில் போட்டி பொதுக்குழு கூட்டம் அறிவிக்கப்பட்டு உள்ளது. இது பாமகவினரிடையே பெரும் குழப்பத்தை ஏற்படுத்தி உள்ளது.
பாமக நிறுவனர் ராமதாஸ் தரப்பில் வரும் 17ந்தேதி பாமக பொதுக்குழு கூட்டம் நடைபெறும் என அறிவிக்கப்பட்டுள்ள நிலையில், பாமக தலைவர் அன்புமணி தலைமையில் ஆகஸ்டு 9ந்தேதி பொதுக்குழு கூட்டம் நடைபெறும் எ அறிவிக்கப்பட்டு உள்ளது. இந்த போட்டி பொதுக்குழு அறிவிப்பு பாமக தொண்டர்கள், மற்றும் நிர்வாகிகள் மத்தியில் சலசலப்பை ஏற்படுத்தி உள்ளது.
பாமகவில் எழுந்துள்ள மோதல் காரணமாக கட்சி இரண்டாக பிளவுபட்டுள்ளது. இதையடுத்து, சாகும்வரை நான்தான் பாமக தலைவர் என்று ராமதாஸ் கூறி வருகிறார். ஆனால், அன்புமணி நாதான் தலைவர் என்று கூறி வருகிறார். இருவரும் ஏட்டிக்குபோட்டியாக கட்சியை நடத்தி வருகின்றனர். இதனால் பல முக்கிய தலைவர்கள், வன்னியர் அமைப்புகள் மாற்று கட்சிகளை நாடும் நிலை உருவாகி உள்ளது.
இந்த நிலையில், பாமக பொதுக்குழு தொடர்பாக, பாமக நிறுவனர் ராமதாஸ் சார்பில், பாமக தலைமை நிலையம் வெளியிட்டுள்ள அறிக்கையில், பாமக நிறுவனர் மற்றும் தலைவர் ராமதாஸ் உத்தரவுபடி, திண்டிவனம் – புதுச்சேரி செல்லும் வழியில் உள்ள பட்டானூர் சங்கமித்ரா திருமண மண்டபத்தில் வரும் 17-ம் தேதி காலை 10 மணிக்கு சிறப்பு பொதுக்குழுக் கூட்டம் நடைபெற உள்ளது. இதில், மாநில, மாவட்ட, மாநகர, ஒன்றிய, நகர நிர்வாகிகள் தவறாது கலந்துகொள்ளுமாறு கேட்டுக்கொள்ளப்படுகிறார்கள். இவ்வாறு அறிக்கையில் தெரிவிக்கப்பட்டுள்ளது.
இதற்கு போட்டியாக அன்புமணியும் பொதுக்குழு கூட்டத்தை கூட்டி உள்ளார். வரும் 9-ம் தேதி (ஆகஸ்டு 9) பொதுக்குழுக் கூட்டம் நடைபெறும் என்று அறிவித்துள்ளார்.
இது தொடர்பாக அன்புமணி மற்றும் பொதுச் செயலாளர் வடிவேல் ராவணன் வெளியிட்ட அறிக்கையில், “பாமக பொதுக்குழுக் கூட்டம் மாமல்லபுரத்தில் உள்ள கான்ப்ளுயன்ஸ் அரங்கில் ஆக. 9-ம் தேதி நடைபெறும். பொதுக்குழு உறுப்பினர்கள் தவறாது பங்கேற்க வேண்டும்” என்று தெரிவிக்கப்பட்டுள்ளது.
பாமகவின் போட்டி பொதுக்குழு கூட்டத்தால் பாமகவினரிடைய மேலும் குழப்பம் ஏற்பட்டுள்ளது.
கெத்து காட்டப்போவது யார்? ராமதாஸ், அன்புமணி இன்று தனித்தனிக்கூட்டம்…. பாமகவில் பரபரப்பு…
அன்புமணி பா.ம.க. கொடியை பயன்படுத்த தடை விதிக்க வேண்டும்! டிஜிபியிடம் பாமக நிறுவனர் மனு
