சென்னை: தமிழ்நாட்டில் 10வது மற்றும் 12வது வகுப்புகளுக்கு திருப்புதல் தேர்வு தேதிகளை அரசு தேர்வு வாரியம் அறிவித்து உள்ளது.
கொரோனா தொற்று குறைந்ததும், கடந்த செப்டம்பர் 1ந்தேதி முதல் 10ம் வகுப்பு மற்றும் 12ம் வகுப்பு மாணாக்கர்களுக்கு பள்ளிகள் திறக்கப்பட்டு நேரடி வகுப்புகள் நடத்தப்பட்டு வருகின்றன. தற்போது ஒமிக்ரான பரவி வருவதால், பள்ளி மாணவர்களின் கல்வி குறித்து பல்வேறு யூகங்கள் எழுப்பப்பட்டு வருகின்றன.
இந்த நிலையில், பள்ளிக்கல்வித்துறை அமைச்சர் அன்பில் மகேஷ் இன்று கல்வித்துறை ஆணையர் மற்றும் மாவட்ட கல்விஅதிகாரிகளுடன் ஆலோசனை நடத்தினார். அதைத் தொடர்ந்து, 10ம் வகுப்பு மற்றும் 12ம் வகுப்பு மாணாக்கர்களுக்கு ஏப்ரல் கடைசி அல்லது மே முதல் வாரத்தில் பொதுத்தேர்வுகள் நடைபெறும் என உறுதி அளித்தார்.
இதையடுத்து, அரசுத் தேர்வுகள் இயக்ககம் 10, 12ம் வகுப்புகளுக்கான திருப்புதல் தேர்வு தேதிகளை வெளியிட்டு உள்ளது. அதன்படி,
தமிழகத்தில் 10 மற்றும் 12-ஆம் வகுப்புகளுக்கு முதலாம் திருப்புதல் தேர்வு (return exam) ஜனவரி 19 முதல் தொடங்குகிறது
10ம் வகுப்பு மாணவர்களுக்கான முதல் திருப்புதல் தேர்வு ஜனவரி 19 – 27 வரையிலும், 2ம் திருப்புதல் தேர்வு மார்ச் 21- 26 வரை நடைபெறும்.
12ம் வகுப்பு மாணவர்களுக்கான முதல் திருப்புதல் தேர்வு ஜனவரி 19 முதல் 28 வரையிலும், 2ம் திருப்புதல் தேர்வு மார்ச் 21 முதல் 29 வரை நடைபெறும் என்று தேர்வுத்துறை அறிவித்துள்ளது.