சென்னை: பாமக நிறுவனர் மருத்துவர் ராமதாஸ் 87வது பிறந்தநாளையொட்டி, அவருக்கு முதலமைச்சர் ஸ்டாலின், காங்கிரஸ் மாநில தலைவர் செல்வபெருந்தகை உள்பட பலர் வாழ்த்து தெரிவித்து உள்ளனர்.
பாமக நிறுவனரும் தமிழ் நாட்டின் மூத்த அரசியல்வாதியுமான மருத்துவர் ராமதாஸின் 87-ஆவது பிறந்தநாள் இன்று. இதனால் அவருக்கு பல்வேறு அரசியல் கட்சித் தலைவர்கள், சட்டப்பேரவை உறுப்பினர்கள் மற்றும் மூத்த நிர்வாகிகள் வாழ்த்து தெரிவித்து வருகின்றனர். இந்த நிலையில் முதலமைச்சர் மு.க.ஸ்டாலின் ராமதாஸுக்கு பிறந்தநாள் வாழ்த்து தெரிவித்துள்ளார்.
இதுகுறித்து, முதலமைச்சர் ஸ்டாலின் எக்ஸ் பக்கத்தில் வெளியிட்டுள்ள வாழ்த்துச் செய்தியில், “பாட்டாளி மக்கள் கட்சியின் நிறுவனத் தலைவர் மருத்துவர் ராமதாஸுக்கு இனிய பிறந்தநாள் நல்வாழ்த்துகள்! நீண்ட ஆயுளோடு, தங்களது பொதுவாழ்க்கைப் பயணம் தொடர வேண்டுமென விழைகிறேன் என்று குறிப்பிட்டுள்ளார்.
அத்துடன், ராமதாஸ் மறைந்த கலைஞருடன் இருந்த புகைப்படத்தை பகிர்ந்துள்ளார்.
இந்த நிலையில் தமிழ்நாடு காங்கிரஸ் கமிட்டி தலைவர் செல்வப்பெருந்தகை வாழ்த்து தெரிவித்து எக்ஸ் தளத்தில் பதிவிட்டுள்ளார். அந்த பதிவில், “தமிழ்நாட்டின் மூத்த அரசியல்வாதியும், பாமக நிறுவனருமான மருத்துவர் ராமதாஸுக்கு இனிய பிறந்தநாள் நல்வாழ்த்துகள். உங்கள் பிறந்த நாளில் நலமும் வளமும் சூழ விரும்புகிறேன். நீண்ட ஆயுளுடன், நல்ல ஆரோக்கியம், மக்கள் சேவையில் மென்மேலும் சிறந்து விளங்கிட விழைகிறேன்”.
இவ்வாறு அதில் தெரிவித்துள்ளார்.
