திருநள்ளாறு: மார்ச் 29ந்தேதி சனிப்பெயர்ச்சி என ஊடகங்களில் தகவல்கள் பரவி வரும் நிலையில், அன்றைய தினம் சனிப்பெயர்ச்சி கிடையாது, அடுத்த சனிப்பெயர்ச்சி 2026ம் ஆண்டுதான் வருகிறது என திருநள்ளாறு சனீஸ்வரர் கோவில் நிர்வாகம் அறிவித்து உள்ளது.
திருக்கணித பஞ்சாங்கத்தின்படி வருகிற 29ஆம் தேதி (மார்ச்) இரவு சனி பெயர்ச்சி என கூறப்படுகிறது. அந்நாளில் திருநள்ளாறு சனீஸ்வரன் ஆலயத்தில் சனி பெயர்ச்சி விழா நடைபெறும் என தகவல்கள் பரவி வருகின்றன. இந்த நிலையில், அன்றைய தினம் சனிப்பெயர்ச்சி கிடையாது, அன்று எந்தவொரு விசேஷ பூஜைகளும் இல்லை என கோவில் நிர்வாகம் அறிவிப்பு வெளியிட்டு உள்ளது.
திருக்கணித பஞ்சாங்கத்தின்படி வருகிற 29ஆம் தேதி (மார்ச்) இரவு சனி பெயர்ச்சி என கூறப்படுகிறது. இந்த சனிப்பெயர்ச்சியில் சனி பகவான் கும்பம் ராசியில் இருந்து மீனம் ராசிக்கு பெயர்ச்சி ஆகிறார். அதாவது, சனி பகவான் வரும் மார்ச் 29 ஆம் தேதி இரவு 10:07 மணிக்கு மீன ராசிக்கு இடம்பெயர்ச்சி அடைவார். மீன ராசியில் சனியின் இந்தப் பெயர்ச்சி 30 ஆண்டுகளுக்குப் பிறகு நிகழப்போகிறது என பல ஜோதிடர்கள், ஆன்மிகவாதிகள் கூறி வருகின்றனர்.
பக்தர்கள், ஜோதிடர்கள், அர்ச்சகர்கள் மற்றும் பொதுமக்கள் மத்தியில் சனி பெயர்ச்சி (Saturn’s transit) தொடர்பாக பல்வேறு செய்திகள் மற்றும் கட்டுரைகள் வெளியாகி வருகின்றன. சனிப்பெயர்ச்சி பலன்களையும் ஊடகங்கள் வெளியிட்டு வருகின்றன.
இந்த நிலையில், சனிப்பெயர்ச்சி வரும் 29ஆம் தேதி அல்ல என சனிஸ்வரர் திருத்தலமான, திருநள்ளாறு ஸ்ரீ தர்பாரண்யேஸ்வரர் ஸ்வாமி தேவஸ்தானம் தரப்பில் விளக்கம் வெளியிடப்பட்டு உள்ளது.
இது தொடர்பாக, திருநள்ளாறு ஸ்ரீ தர்பாரண்யேஸ்வரர் சுவாமி தேவஸ்தானம் வெளியிட்டுள்ள தகவலில், அருள்மிகு ஸ்ரீ சனீஸ்வர பகவான் புண்ணியத் திருத்தலம் “வாக்கிய பஞ்சாங்கம்” முறையை பின்பற்றுவதை தெளிவுபடுத்துகிறோம். இந்த பாரம்பரிய கணிப்பு முறையின் படி. 2026ஆம் ஆண்டிலேயே சனிப் பெயர்ச்சி நடைபெறும் என தெரிவிக்கின்றோம்.
ஆகையினால் 29.03.2025 அன்று வழக்கமாக நடைபெறும் தினசரி பூஜைகள் மட்டுமே நடைபெறும்.
திருநள்ளாறு ஸ்ரீ சனீஸ்வர பகவான் திருத்தலத்தில் சனி பெயர்ச்சி சம்பந்தமான நிகழ்வு (Transit Rituals) நடைபெறும் சரியான தேதி மற்றும் நேரம் பின்னர் அதிகாரப்பூர்வமாக அறிவிக்கப்படும்.
பக்தர்கள், ஜோதிடர்கள், அர்ச்சகர்கள் மற்றும் பொது மக்கள் திருநள்ளாறு கோயிலில் பின்பற்றப்படும் பாரம்பரிய வாக்கிய பஞ்சாங்க வழிபாட்டு மரபை கருத்தில் கொண்டு செயல்படுமாறு கேட்டுக் கொள்ளப்படுகிறார்கள்.
இவ்வாறு கூறப்பட்டுள்ளது.