சென்னை: பிப்ரவரி 18ம் தேதி, சென்னையில் நடைபெறவுள்ள 2021ம் ஆண்டு ஐபிஎல் ஏலத்தில் இடம்பெற, ஆஸ்திரேலியாவின் மிட்செல் ஸ்டார்க் & இங்கிலாந்தின் ஜோ ரூட் ஆகியோர் தங்களின் பெயர்களைப் பதிவுசெய்து கொள்ளவில்லை. அதேசமயம், ஷாகிப் அல் ஹசன் மற்றும் ஸ்ரீசாந்த் ஆகியோர் தங்களின் பெயர்களைப் பதிவுசெய்துள்ளனர்.
இவர்கள் தவிர, டேவிட் மாலன், மார்னஸ் லபுஷேன் மற்றும் அலெக்ஸ் ஹேல்ஸ் ஆகியோரும் ஏலத்திற்காக பதிவு செய்துள்ளனர்.
இந்தியர்கள் 814 பேர் மற்றும் வெளிநாட்டு வீரர்கள் 283 பேர் என்று, மொத்தமாக 1097 வீரர்கள், பிப்ரவரி 4ம் தேதி வரையிலான காலக்கெடுவில் பதிவு செய்துள்ளனர். அதேசமயம், இந்தப் பட்டியலில் விடுபட்டுள்ள பிரபலமான பெயர் மிட்செல் ஸ்டார்க்கினுடையது. கடைசியாக, கடந்த 2015ம் ஆண்டு ஐபிஎல் தொடரில், பெங்களூரு அணிக்காக ஆடினார் ஸ்டார்க்.
இந்தாண்டின் இறுதியில், இந்தியாவில் டி-20 உலகக்கோப்பை தொடர் நடைபெறவுள்ளது. மேலும், இந்தாண்டில், இங்கிலாந்திற்கு எதிரான ஆஷஸ் டெஸ்ட் தொடரும் நடைபெறவுள்ளது. இந்த இரண்டிலும் மிட்செல் ஸ்டார்க் பங்கேற்பார் என்று எதிர்பார்க்கப்படுகிறது.