கடந்த 12ம் தேதி விண்ணில் நிலைநிறுத்தப்பட்ட மைக்ரோசாட் நானோசாட் செயற்கைகோள்கள் பூமியை படம் எடுத்து அனுப்பிய ஒளிப்படங்களை இஸ்ரோ வெளியிட்டு இருக்கிறது.
இந்திய விண்வெளி ஆராய்ச்சி நிறுவனம் (இஸ்ரோ) கடந்த 12ம் தேதி, பிஎஸ்எல்வி சி40 என்ற ராக்கெட் மூலம் 31 செயற்கைகோள்களை விண்ணில் நிலை நிறுத்தியது. இந்த 31 செயற்கைகோள்களில், மைக்ரோசாட், நானோசாட் என்ற இரண்டு சாட்லைட்கள் நேற்று பூமியில் ஒரு நிலப்பகுதியை படம் எடுத்து அனுப்பியுள்ளன. இதில் மைக்ரோசாட் எனப்படுவது 100 கிலோ எடையுடன் முழுக்க முழுக்க இந்தியாவில் தயாரிக்கப்பட்டதாகும்.
இது குறித்து விண்வெளி பயன்பாடுகள் மையத்தின் இயக்குனர் தீபன் மிஸ்ரா, தெரிவித்ததாவது:
“மைக்ரோசாட் செயற்கைகோள்கள் அகச்சிவப்புகதிர்கள் மூலம் இந்த நிலப்பகுதியை படம் எடுத்து அனுப்பியுள்ளது. இதற்கு முன்பு புவியை படம் எடுத்த செயற்கைகோள்கள் இந்த அகச்சிவப்பு முறையில் படம் எடுக்கவில்லை.
இதே போல், நானோசாட் (INS-1C) செயற்கைகோளானது இந்தியாவின் மூன்றாவது நானோ நுட்பத்தில் தயாரிக்கப்பட்ட செயற்கைகோள். இதன் மூலம் புவி நிலத்தின் இயற்பியல் பண்புகள், அளவுகளை கணிக்கவும், மேகமூட்டம், வேளாண் நிலத்தை ஆய்வு செய்யவும் முடியும்” என்றார். .
இதற்கு முன்பு கடந்த வாரம் கார்டோசாட்-2 செயற்கைகோள், தனது முதல் ஒளிப்பபடத்தை அனுப்பியது குறிப்பிடத்தக்கது.