டி-20 கிரிக்கெட்டில் தொடர்ந்து 8 தொடர்களில் தோல்வியே காணாமல் வலம் வந்த இங்கிலாந்து அணிக்கு கடிவாளம் போட்டுள்ளது இந்திய அணி. அதேசமயம், தனது வெற்றி நடையைத் தொடர்ந்து வருகிறது.
* இங்கிலாந்து அணி 2018 அக்டோபர் 27ம் தேதி இலங்கைக்கு எதிரான டி-20 தொடர் வெற்றியிலிருந்து தொடர்ந்து 8 தொடர்களைக் கைப்பற்றியது. கடைசியாக, கடந்தாண்டு நவம்பர் மாதம் தென்னாப்பிரிக்காவுக்கு எதிராக டி-20 தொடரை வென்றது. 8 தொடர்களை வென்று வெற்றி நடை போட்ட இங்கிலாந்து அணியை இந்திய அணி பிரேக் போட்டு நிறுத்தியுள்ளது. கடைசியாக 2018ம் ஆண்டில் இந்திய மண்ணில் இந்தியாவிடம் டி-20 தொடரை இங்கிலாந்து இழந்தது. தற்போது மீண்டும் தொடரை பறிகொடுத்துள்ளது.
* இந்திய அணி 2019ம் ஆண்டு ஆகஸ்ட் 3ம் தேதி விண்டீஸ் அணிக்கு எதிரான டி-20 தொடரிலிருந்து தொடர்ந்து 7 டி-20 தொடர்களை வென்ற நிலையில், நேற்று 8வது டி-20 தொடரையும் கைப்பற்றியது. இங்கிலாந்து அணிக்கு 8வது டி20 தொடரோடு முற்றுப்புள்ளி வைத்த இந்திய அணி, 8வது தொடர் வெற்றிக்குள் நகர்ந்துள்ளது.
* இங்கிலாந்து அணிக்கு எதிராக நேற்றைய ஆட்டத்தில் 2 விக்கெட் இழப்புக்கு 224 ரன்கள் சேர்த்ததே டி-20 போட்டியில், அந்த அணிக்கு எதிராக இந்திய அணி சேர்த்த அதிகபட்சமாகும். இதற்குமுன் 2010ம் ஆண்டு டி-20 உலகக் கோப்பையின்போது 4 விக்கெட் இழப்புக்கு 218 ரன்கள் இந்திய அணி சேர்த்ததே அதிகபட்சமாக இருந்தது.
* விராத் கோலி நேற்றைய ஆட்டத்தில் 7வது டி-20 தொடர் நாயகன் விருதை வென்றார். டி-20 வரலாற்றில் இதுவரை எந்த நாட்டு வீரரும் 7 தொடர் நாயகன் விருதுகளைப் பெற்றதில்லை. அதிகபட்சமாக 4 விருதுகளை பாபர் ஆஸம், முகமது ஹபிஸ் மட்டுமே பெற்றுள்ளனர்.
* டி-20 போட்டிகளில் அதிகமான ரன்கள் சேர்த்த வீரர்களில் ரோகித் சர்மாவுக்கு அடுத்து ஒரு வீரர் மட்டுமே உள்ளார். தற்போது ரோஹித் ஷர்மா 2,864 ரன்களுடன் 2வது இடத்தில் உள்ளார். நியூஸிலாந்து வீரர் மார்டின் கப்தில் (2,839) சாதனையை நேற்றைய ஆட்டத்தில் ரோகித் முறியடித்தார். அதிகமான பவுண்டரி அடித்த எண்ணிக்கையில் ரோகித் (254) 2வது இடத்திலும், சிக்ஸர் அடித்த எண்ணிக்கையில் (133) இரண்டாவதாகவும் ரோகித் உள்ளார்.
* டி-20 கிரிக்கெட் உலகில் விராத் கோலி அடித்த ரன்கள் அல்லது அரை சதங்கள் அளவுக்கு உலகில் எந்த நாட்டு அணியின் கேப்டனும் இதுவரை அடிக்கவில்லை. கேப்டன் என்ற வரிசையில் ஆஸ்திரேலியாவின் ஆரோன் பின்ச்சின் 1,462 ரன்கள் சாதனையையும் முறியடித்த கோலி, அரைசதம் அடித்த எண்ணிக்கையில் நியூசிலாந்து கேப்டன் வில்லியம்ஸனின் 11 அரை சதங்களையும் முறியடித்து 12 அரை சதங்களுடன் முதலிடத்தில் உள்ளார்.
* டி-20 போட்டிகளில் அதிவேகமாக 1000 ரன்களை எட்டிய வீரர் எனும் பெருமையை இங்கிலாந்து வீரர் டேவிட் மலான் பெற்றார். 24 இன்னிங்ஸ்களில் டேவிட் மலான் இந்தச் சாதனையை எட்டினார். இதற்கு முன் பாகிஸ்தான் வீரர் பாபர் ஆஸம் 26 இன்னிங்ஸ்களில் ஆயிரம் ரன்களை எட்டியிருந்தார். அதை மலான் முறியடித்தார்.
* இங்கிலாந்து அணியின் ஜோஸ் பட்லர், டேவிட் மலான் 2வது விக்கெட்டுக்கு 130 ரன்கள் சேர்த்ததே டி-20 சேஸிங்கில் 2வது விக்கெட்டுக்கு சேர்க்கப்பட்ட 2வது அதிகபட்சமாகும்.