இந்தியா- ஐரோப்பிய ஒன்றிய வர்த்தக ஒப்பந்தம்: அமெரிக்கா கடும் விமர்சனம்

இந்தியாவுடன் சுதந்திர வர்த்தக ஒப்பந்தம் (FTA) செய்துள்ள ஐரோப்பிய ஒன்றியத்தை அமெரிக்கா கடுமையாக விமர்சித்துள்ளது.

அமெரிக்க நிதியமைச்சர் ஸ்காட் பெசென்ட், இந்த ஒப்பந்தம் மூலம் உக்ரைன் போரைவிட ஐரோப்பா வர்த்தகத்திற்கே முன்னுரிமை கொடுத்துள்ளது என்று குற்றம் சாட்டினார்.

சிஎன்பிசி தொலைக்காட்சிக்கு பேட்டி அளித்த அவர், “ஐரோப்பாவின் இந்த முடிவால் நான் மிகுந்த கவலை அடைந்துள்ளேன். உக்ரைனில் நடக்கும் போரை குறைப்பதற்குப் பதிலாக, வர்த்தகமே முக்கியம் என்று ஐரோப்பா நினைத்துள்ளது” என்று தெரிவித்தார்.

உலகளவில் பதற்றம் அதிகரித்து வரும் சூழலில், அமெரிக்கா மீது இருந்த சார்பை குறைக்கவும், இருதரப்பு வர்த்தகத்தை அதிகரிக்கவும் ஐரோப்பிய ஒன்றியம் இந்தியாவுடன் நீண்ட காலமாக பேசி வந்த இந்த வர்த்தக ஒப்பந்தத்தை சமீபத்தில் முடித்துள்ளது. இதை தற்போது அமெரிக்கா விமர்சித்துள்ளது.

இந்த ஒப்பந்தத்தின் படி, இந்தியா–ஐரோப்பிய ஒன்றியம் இடையே பரிமாறப்படும் சுமார் 96.6 சதவீத பொருட்களுக்கான சுங்க வரி முழுமையாக நீக்கப்படும் அல்லது பெரிதும் குறைக்கப்படும். அதனாலேயே இது “சுதந்திர வர்த்தக ஒப்பந்தம்” என்று அழைக்கப்படுகிறது.

இந்த ஒப்பந்தத்தின் மூலம், 2032 ஆம் ஆண்டுக்குள் இந்தியாவுக்கு ஐரோப்பாவிலிருந்து வரும் ஏற்றுமதி இரட்டிப்பாகும் என்று எதிர்பார்க்கப்படுகிறது. மேலும், ஐரோப்பிய நிறுவனங்களுக்கு சுமார் 4 பில்லியன் யூரோ அளவுக்கு வரி சேமிப்பு கிடைக்கும்.

கடந்த ஆண்டு இந்தியா மீது அமெரிக்கா விதித்த கூடுதல் சுங்க வரிகளை, ஐரோப்பிய ஒன்றியம் ஏன் எதிர்த்தது என்பதற்கான காரணம் இந்த ஒப்பந்தம் தான் என்று ஸ்காட் பெசென்ட் கூறினார்.

“அமெரிக்காவுடன் சேர்ந்து நிற்க ஐரோப்பாவுக்கு விருப்பமில்லை. ஏனெனில், அவர்கள் இந்த வர்த்தக ஒப்பந்தத்தை முடிக்க விரும்பினார்கள். உக்ரைன் மக்களின் பாதுகாப்பைப் பற்றி அடிக்கடி பேசிய அதே ஐரோப்பா, இப்போது உக்ரைனை விட வர்த்தகத்திற்கே முக்கியத்துவம் கொடுத்துள்ளது” என்று அவர் குற்றம் சாட்டினார்.

மேலும், ரஷ்யாவிலிருந்து வரும் கச்சா எண்ணெயை இந்தியா வாங்கி, அதை சுத்திகரித்து தயாரிக்கும் எரிபொருள் பொருட்களை ஐரோப்பிய நாடுகள் வாங்குகின்றன. இதன் மூலம், ரஷ்யா நடத்தும் உக்ரைன் போருக்கு ஐரோப்பா மறைமுகமாக நிதி உதவி செய்கிறது என்றும் அவர் கூறினார்.

“ரஷ்யாவின் கச்சா எண்ணெய் இந்தியாவுக்கு வருகிறது. அங்கே அது சுத்திகரிக்கப்படுகிறது. பிறகு அந்த தயாரிப்புகளை ஐரோப்பா வாங்குகிறது. இப்படி உக்ரைன் போருக்கு பணம் செல்லும் சூழல் உருவாகிறது” என்று பெசென்ட் தெரிவித்தார்.