டெல்லி: முன்னாள் பிரதமர் மன்மோகன் சிங்கிற்கு, அகில இந்திய காங்கிரஸ் கட்சியின் முன்னாள் தலைவரும், எம்.பி.யுமான ராகுல்காந்தி பிறந்தநாள் வாழ்த்து தெரிவித்துள்ளார்.
மன்மோகன் சிங் 1932ஆம் ஆண்டு செப்டம்பர் 26 ஆம் தேதி தற்போதைய பாகிஸ்தானில் உள்ள பஞ்சாப் மாகாணத்தில் பிறந்தார். பஞ்சாப் பல்கலைக்கழகம், கேம்ப்ரிட்ஜ் பல்கலைக்கழகம் மற்றும் ஆக்ஸ்போர்டு பல்கலைக்கழகம் ஆகியவற்றில் பயின்றுள்ள இவர் பொருளாதாரத்தில் டாக்டர் பட்டம் பெற்றுள்ளார்.
பொருளாதார மேதையான முன்னாள் பிரதமர் டாக்டர் மன்மோகன்சிங்கின் 88வது பிறந்தநாள் இன்று கொண்டாடப்படுகிறது. இதையொட்டி, பல்வேறு அரசியல் தலைவர்கள் வாழ்த்து தெரிவித்து வருகின்றனர். காங்கிரஸ் தலைவர்கள் ராகுல் காந்தி, சோனியா காந்தி மற்றும் பல்வேறு அரசியல் கட்சியினர் வாழ்த்து தெரிவித்துள்ளனர்.
ராகுல் காந்தி வெளியிட்டுள்ள வாழ்த்துச் செய்தியில், “டாக்டர் மன்மோகன் சிங் போன்ற ஒரு பிரதமர் இல்லாததை இந்தியா ஆழமாக உணர்கிறது. அவரது நேர்மை, கண்ணியம் மற்றும் அர்ப்பணிப்பு நம் அனைவருக்கும் உத்வேகம் அளிக்கிறது. அவருக்கு மிகவும் மகிழ்ச்சியான பிறந்த நாள் வாழ்த்துகள் , ஒரு அழகான வருடம் காத்திருக்கிறது” என்று பதிவிட்டுள்ளார்.
Patrikai.com official YouTube Channel
