சென்னை: போலி ஜாதி சான்று கொடுத்து உள்ளாட்சி தேர்தலில் போட்டியிட்டு வென்ற, புழல் பஞ்சாயத்து யூனியன் காங்கிரஸ் கவுன்சிலர் மல்லிகா என்பவரை உடனடியாக பதவி நீக்கம் செய்ய சென்னை உயர்நீதிமன்றம் உத்தரவிட்டுள்ளது.
தமிழகத்தில் கடந்த 2019ஆம் ஆண்டு உள்ளாட்சித் தேர்தல் நடைபெற்றது. இதில் திமுகவே பெருவாரியாக வெற்றி பெற்று, உள்ளாட்சிகளை கையகப்படுத்தியது. இந்த நிலையில், திருவள்ளூர் மாவட்டம், புழல் பஞ்சாயத்து யூனியன் கவுன்சிலர் பதவிக்கு காங்கிரஸ் சார்பில் போட்டியிட்ட மல்லிகா என்பவர் போலி சாதி சான்றிதழ் கொடுத்து தேர்தலில் போட்டியிட்டதாக குற்றம் சட்டப்பட்டது.
இதுதொடர்பாக தேர்தல் கமிஷன் முறையான நடவடிக்கை எடுக்காத நிலையில், இதுதொடர்பாக, ராஷியா என்பவர் சென்னை உயர்நீதிமன்றத்தில் வழக்கு தொடர்ந்தார். அவரது மனுவில், “மிகவும் பிற்படுத்தப்பட்ட வகுப்பைச் சேர்ந்த மல்லிகா, பட்டியல் இனத்தைச் சேர்ந்தவர் என போலி ஜாதி சான்றிதழ் அளித்து, பட்டியல் இனத்தவர்களுக்காக ஒதுக்கப்பட்ட வார்டில் போட்டியிட்டு வெற்றி பெற்றுள்ளார். ஆகவே, அவருக்கு எதிராக நடவடிக்கை எடுக்க உத்தரவிட வேண்டும்” என வலியுறுத்தி இருந்தார்.
இந்த மனு சென்னை உயர்நீதிமன்ற நீதிபதிகள் ஆர்.சுப்பிரமணியன் மற்றும் சி.குமரப்பன் அமர்வில் விசாரிக்கப்பட்டு வந்தது.. அப்போது மனுதாரர் தரப்பில் ஆஜரான வழக்கறிஞர் வேல்முருகன், “மிகவும் பிற்படுத்தப்பட்ட வகுப்பைச் சேர்ந்த மல்லிகா, பட்டியல் இனத்தவர்களுக்காக ஒதுக்கப்பட்ட வார்டில் போட்டியிட உரிமை இல்லை. இது சம்பந்தமாக கடந்த 2023ஆம் ஆண்டு ஜனவரி மாதம் முதல் அரசு அதிகாரிகளுக்கு புகார் மனுக்கள் அனுப்பியும் எந்த நடவடிக்கையும் எடுக்கப்படவில்லை” என தெரிவித்தார்.
இதனைத் தொடர்ந்து மல்லிகா தரப்பில், “தனது கணவர் பட்டியல் இனத்தைச் சேர்ந்தவர் என்ற அடிப்படையில் இந்த வார்டில் போட்டியிட்டதாக” தெரிவிக்கப் பட்டது.
இந்த வாதத்தை ஏற்க மறுத்த நீதிபதிகள், திருமணத்தின் மூலம் ஒருவரின் ஜாதி மாறிவிடாது என்றும், மாறாக அவர்களின் குழந்தைகள் பட்டியல் இனத்தவர்களுக் கான சலுகைகளை பெற உரிமை உள்ளது என்றும் தெரிவித்தனர்.
பட்டியல் இனத்தவர்களுக்காக ஒதுக்கப்பட்ட வார்டில் போட்டியிட மல்லிகாவுக்கு தகுதி இல்லை என குறிப்பிட்ட நீதிபதிகள், உடனடியாக அவரை கவுன்சிலர் பதவியில் இருந்து நீக்க வேண்டும் என்றும், அவருக்கு வழங்கப்பட்ட ஜாதி சான்றிதழை ரத்து செய்ய வேண்டும் என்றும் உத்தரவிட்டுள்ளனர்.