சென்னை: கேள்வி நேரத்தில் புகழ்ந்து பேச வேண்டாம் என திமுக எம்எல்ஏக்களுக்கு சட்டப்பேரவையில் முதல்வர் ஸ்டாலின் அறிவுரை கூறினார்.
தமிழக சட்டப்பேரவை மானிய கோரிக்கை கூட்டத்தொடர் நடைபெற்று வருகிறது, இன்று 2வது நாள் கூட்டம் தொடங்கி நடைபெற்று வருகிறது. இன்று நகராட்சி நிர்வாகம், குடிநீர் வழங்கல் துறை மீதான மானிய கோரிக்கை விவாதம் மற்றும் ஊரக வளர்ச்சித்துறை மீதான மானிய கோரிக்கை விவாதம் நடைபெற உள்ளது. இதில், புதிய கூட்டு குடிநீர் திட்டங்கள், ஊரக சாலை மேம்பாட்டு திட்டம் -புதிய அறிவிப்புகள் வெளியாக வாய்ப்பு இருக்கிறது.
அவை இன்று காலை தொடங்கியதும், வழக்கமான நடைமுறைப்படி கேள்வி நேரம் நடைபெற்றது. அப்போது, உறுப்பினர்களின் கேள்விகளுக்கு துறைசார்ந்த அமைச்சர்கள் பதில் அளித்து வந்தனர். அப்போது சிலர் திமுக தலைவரும், முதல்வர் குறித்து புகழ்ந்து பேசினார்.
இதையடுத்து, இருக்கையில் இருந்து எழுந்த முதல்வர் ஸ்டாலின், கேள்வி நேரத்தை புகழ்ந்து பேச பயன்படுத்தி வீணடிக்க வேண்டாம் என திமுக எம்.எல்.ஏக்களுக்கு கறாராக அறிவுறுத்தினார்.