சென்னை: சென்னை நத்தம்பாக்கத்தில் உள்ள வர்த்தக மையத்தில் umagine TN- 2026 தகவல் தொழில்நுட்ப உச்சி மாநாட்டை முதலமைச்சர் மு.க.ஸ்டாலின் தொடங்கி வைத்தார். இந்த மாநாட்டில் பல்வேறு ஒப்பந்தங்கள் கையெழுத்தாகி உள்ளது.
சென்னை நத்தம்பாக்கத்தில் உள்ள வர்த்தக மையத்தில், தமிழ்நாடு அரசின் தகவல் தொழில்நுட்பவியல் மற்றும் டிஜிட்டல் சேவைகள் துறை சார்பில், umagine TN- 2026 தகவல் தொழில்நுட்ப 2 நாள் உச்சி மாநாடு நடைபெறுகிறது. இந்த உச்சி மாநாட்டை முதலமைச்சர் மு.க.ஸ்டாலின் தொடங்கி வைத்தார்.
மாநாட்டை தொடங்கி வைக்க வர்த்தக மையத்துக்கு வந்த முதல்வர் ஸ்டாலினுக்கு மனித ரோபோ கைகொடுத்து வரவேற்பு தெரிவித்தது. இந்த மாநாட்டில், முதலமைச்சர் மு.க.ஸ்டாலின் முன்னிலையில் பல்வேறு தொழில் நிறுவனங்களுடன் புரிந்துணர்வு ஒப்பந்தங்கள் கையெழுத்தானது.
நிகழ்ச்சியில் பேசிய முதல்வர் ஸ்டாலின், தமிழ்நாட்டில் தகவல்தொழிநுட்ப வளர்ச்சி பயணத்தில் இந்த மாநாடு முக்கியமானதாக அமையும் என கூறியதுடன், திராவிட மாடல் அரசு ஆட்சிக்கு வந்தபின்தான், தகவல் தொழில்நுட்ப மாநாடு நடத்தப்படுகிறது என்றும், தகவல் தொழில்நுட்ப துறையில் தமிழ்நாடு முன்னேற அடித்தளம் அமைத்தவர் கலைஞர். தகவல் தொழில்நுட்ப துறையில் சாமானிய மக்களும் வளர்ச்சி பெற திட்டம் தீட்டியவர் கலைஞர் என தெரிவித்தார்.
”நாம் ஆட்சிக்கு வந்த பிறகுதான் இந்த மாநாட்டை தொடங்கினோம். தற்போது இந்த மாநாடு நல்ல வளர்ச்சி பெற்றுள்ளது பெருமையாக உள்ளது. மற்ற மாநிலங்களை விட தொழில்நுட்பத்துறையில் தமிழ்நாடு முன்னிலை வகிக்கிறது. தொழில்நுட்பத்துறையில் நாம் இந்த நிலையில் இருப்பதற்கு காரணம் கலைஞர். தமிழ்நாட்டின் ஐ.டி.பாலிசியை கொண்டுவந்தவர் கலைஞர். தமிழ்நாட்டின் மைய அச்சு, தகவல் தொழில்நுட்பம். தகவல் தொழில்நுட்ப வளர்ச்சியின் முக்கிய அங்கமாக இந்த மாநாடு அமைந்துள்ளது. தகவல் தொழில்நுட்பத்தை சமூக முன்னேற்றத்திற்கான கருவியாக பார்க்க வேண்டும்.
எல்லா துறைகளும் ஒரே இலக்கில் செல்கின்றன. அறிவியல் அணுகுமுறைகளை தமிழ்நாடு கையாளுகிறது. தொழில்நுட்பம் எல்லோரையும் சமமாக சென்றடைய வேண்டும். புதுயுகத் தொழில்நுட்பத்தில் தமிழ்நாடு முதலிடத்தில் உள்ளது. உலகளாவிய திறன் மையத்தின் தலைநகராக தமிழ்நாடு மாறிவருகிறது. மற்ற மாநிலங்களை காட்டிலும் தொழில்நுட்ப வளர்ச்சியில் தமிழ்நாடு முன்னிலையில் உள்ளது. 32 மாவட்டங்களில் மென் பொருள் ஏற்றுமதி நடக்கிறது என்று ஒன்றிய அரசு சொல்கிறது, ஒன்றிய| அரசு சொல்லும் இந்த தரவு தான் திராவிட மாடல்.”
இவ்வாறு அவர் பேசினார்.
[youtube-feed feed=1]