லண்டன்: இங்கிலாந்தில் நடைபெற்றுவரும் ஏடிபி பைனல்ஸ் டென்னிஸ் தொடரில், ஆறாவது முறையாக அரையிறுதிக்கு தகுதிபெற்றுள்ளார் ஸ்பெயின் நாட்டின் ரஃபேல் நாடல்.
லண்டனில் நடந்துவருகிறது ஆண்களுக்கான ஏடிபி பைனல்ஸ் டென்னிஸ். இத்தொடரில், உலகத் தரவரிசைப் பட்டியலில் முதல் 8 இடங்களுக்குள் இருக்கும் வீரர்கள், ரவுண்ட் ராபின் முறையில் மோதுகின்றனர்.
இந்நிலையில், ‘பி’ பிரிவில் இடம்பெற்ற உலகின் நம்பர் 2 வீரர் நாடல், நம்பர் 6 வீரரான கிரீஸ் நாட்டின் ஸ்டெபானஸ் டிசிட்சிபாஸுடன் மோதினார். முடிவில், 6-4, 4-6, 6-2 என்ற கணக்கில் வெற்றிபெற்றார் நாடல்.
இதுவரை தான் ஆடியுள்ள 3 போட்டிகளில், 2 வெற்றி & 1 தோல்வி என்ற அடிப்படையில், அரையிறுதிக்கு தகுதிபெற்றுள்ளார் நாடல். இத்தொடரில், நாடல், ஒருமுறைகூட கோப்பை வென்றதில்லை என்பது குறிப்பிடத்தக்கது.