உலகளவில் இயற்கை எரிவாயு பற்றாக்குறை நிலைமை நிலவுவதால், எரிவாயு சந்தையில் ஏற்பட்டுள்ள குழப்பத்தை பயன்படுத்தி, தென் ஆசிய நாடுகளை கவர ரஷ்யா புதிய முயற்சி எடுத்துள்ளது. அமெரிக்கா தடை விதித்த தனது LNG (திரவ இயற்கை எரிவாயு) ஏற்றுமதியை, சந்தை விலையை விட சுமார் 40% தள்ளுபடியில் வழங்க ரஷ்யா முன்வந்துள்ளதாக தகவல்கள் வெளியாகியுள்ளன.
இந்த LNG சரக்குகள், சீனா மற்றும் ரஷ்யாவை சேர்ந்த இடைத்தரகர்கள் மூலம் வழங்கப்படுகின்றன. மேலும், இந்த எரிவாயு ஓமன் அல்லது நைஜீரியா போன்ற நாடுகளில் இருந்து வந்தது போல காட்ட சட்டவிரோத சலுகைகளுடன் போலி ஆவணங்களையும் அவர்களே வழங்குவதாகக் கூறப்படுகிறது.
ஹோர்முஸ் கடல்சந்தி தாக்கம்
ஹோர்முஸ் கடல்சந்தி மூடப்பட்ட நிலையும், கத்தார் நாட்டில் உள்ள LNG ஏற்றுமதி நிலையங்கள் மீது தாக்குதல் நடந்ததாலும், உலகளாவிய எரிவாயு விநியோகத்தில் சுமார் 20% பாதிப்பு ஏற்பட்டுள்ளது. இதனால் விலைகள் அதிகரித்துள்ளன.
இந்தியா, வங்காளதேசம் பாதிப்பு
இந்தியா மற்றும் வங்காளதேசம் ஆகிய நாடுகள், கத்தாரில் இருந்து LNG கிடைக்காததால் அதிக விலைக்கு மாற்று வழிகளை தேட வேண்டிய நிலைக்கு தள்ளப்பட்டுள்ளன.
கடந்த ஆண்டு வங்காளதேசம் தனது LNG தேவையின் 60% ஐ கத்தாரில் இருந்து பெற்றிருந்தது. தற்போது அது ஸ்பாட் மார்க்கெட்டில் வாங்க வேண்டியதால், முன் ஒப்பந்தத்தை விட இரட்டிப்பு செலவு செய்ய வேண்டிய நிலை ஏற்பட்டுள்ளது.
மேலும், LNG விநியோகம் குறைந்ததால், இந்தியா மற்றும் வங்காளதேசம் உரத் தொழிலுக்கு (fertilizer sector) வழங்கும் எரிவாயுவையும் குறைத்துள்ளன.
இந்தியாவின் நிலைப்பாடு
இந்தியா பொதுவாக அமெரிக்கா தடை விதித்த எரிசக்தி பொருட்களை இறக்குமதி செய்வதில் எச்சரிக்கையாக இருக்கும். முன்பு, கருப்புப் பட்டியலில் உள்ள ரஷ்ய LNG திட்டங்களில் இருந்து வாங்கமாட்டோம் என தெரிவித்துள்ளது.
ரஷ்யாவின் திட்டம்
ரஷ்யா தனது Arctic LNG 2 மற்றும் Portovaya போன்ற திட்டங்களில் இருந்து ஏற்றுமதியை அதிகரிக்க முயற்சி செய்கிறது. ஆனால், அமெரிக்காவின் எதிர்வினை பயத்தால் பல நாடுகள் இந்த LNG வாங்க தயங்குகின்றன.
தற்போது, சீனா மட்டுமே இந்த தடை விதிக்கப்பட்ட ரஷ்ய LNG-ஐ வாங்கி வருகிறது. இதை மற்ற நாடுகளுக்கும் விரிவாக்க முயற்சியில் ரஷ்யா ஈடுபட்டுள்ளது.
உலக எரிவாயு சந்தையில் ஏற்பட்டுள்ள குழப்பத்தை பயன்படுத்தி, சட்டவிரோத சலுகைகளை வழங்கி தென் ஆசியாவில் புதிய வாடிக்கையாளர்களை பெற ரஷ்யா முயற்சி செய்கிறது. ஆனால், அரசியல் மற்றும் பொருளாதார தடைகள் காரணமாக இந்த முயற்சி எவ்வளவு வெற்றியடையும் என்பது இன்னும் தெளிவாக தெரியவில்லை.
[youtube-feed feed=1]