டெல்லி
மாநிலங்களவை தலைவர் ஜெகதீப் தன்கர் மீது இந்தியா கூட்டணி நம்பிக்கை இல்லா தீர்மானம் கொண்டு வரவுள்ளதாக கூறப்படுகிறது.
பிரபல இந்திய தொழிலதிபர் அதானி மீது சூரிய சக்தி மின் திட்டத்துக்காக இந்திய அதிகாரிகளுக்கு கோடிக்கணக்கில் லஞ்சம் கொடுத்ததாக அமெரிக்க நீதிமன்றத்தில் வழக்கு தொடரப்பட்டு அவருக்கு எதிராக பிடிவாரண்டும் பிறப்பிக்கப்பட்டது.
இதை நாடாளுமன்ற கூட்டுக்குழு அமைத்து விசாரிக்க வேண்டும் என காங்கிரஸ் உள்ளிட்ட எதிர்க்கட்சிகள் மத்திய அரசை வலியுறுத்தி வருகின்றன. அவர்கள் இந்த பிரச்சினையை முன்வைத்து நாடாளுமன்றத்தில் அமளியில் ஈடுபட்டு வருவதால் குளிர்கால கூட்டத்தொடரின் நாட்கள் தொடர்ந்து ஒத்திவைக்கப்பட்டு வருகின்றன.
அதானி விவகாரம் தொடர்பாக, மாநிலங்களவை தலைவர் ஜெக்தீப் தன்கர் மீது நம்பிக்கை இல்லா தீர்மானம் கொண்டு வர இந்தியா கூட்டணி முடிவு செய்துள்ளதாக தகவல் வெளியாகி உள்ளது.
மேலும் மாநிலங்களவை தலைவர் ஒருதலைபட்சமாக செயல்படுவதாக கூறி, அவருக்கு எதிராக நம்பிக்கையில்லா தீர்மானம் கொண்டு வர உள்ளதாகவும் தகவல்கள் தெரிவிக்கின்றன.