சென்னை: தமிழ்நாட்டில் உள்ள அரசு சட்ட கல்லூரியில் காலியாக உள்ள பேராசிரியர் பணியிடங்களை விரைந்து நிரப்புங்கள் என தமிழ்நாடு அரசுக்கு உயர்நீதிமன்றம் அறிவுறுத்தி உள்ளது.
தமிழகத்தில் உள்ள அரசு சட்டக் கல்லுரிகளில் காலியாக உள்ள இணைப் போரசிரியர் பணிக்கு நேரடி நியமனங்கள் மேற்கொள்ளக் கோரி வசந்தகுமார் என்பவர் சென்னை உயர்நீதிமன்றத்தில் கடந்த 2018ம் ஆண்டு பொதுநல வழக்கு தொடர்ந்திருந்தார்.
இந்த வழக்கு கடந்த 5 ஆண்டுகளாக கிடப்பில் போடப்பட்டிருந்த நிலையில், தற்போது மீண்டும் விசாரிக்கப்பட்டு வருகிறது. இந்த வழக்கில் சட்டக்கல்வி இயக்குனர் சார்பில் தாக்கல் செய்யப்பட்ட பதில் மனுவில், “தமிழகத்தில் உள்ள 15 அரசு சட்டக் கல்லூரிகளில், அனுமதிக்கப்பட்ட 20 இணை பேராசிரியர் பணியிடங்களில் 19 பணியிடங்கள் காலியாக உள்ளது, மொத்தமுள்ள 206 உதவிப் பேராசிரியர் பணியிடங்களில், 70 பணியிடங்கள் காலியாக உள்ளது, இப்பணியிடங்களை நிரப்ப நடவடிக்கை எடுக்கப்பட்டு வருகிறது,”என குறிப்பிடப்பட்டிருந்தது.
இந்த வழக்கை விசாரித்த உயர்நீதிமன்ற நீதிபதி பட்டு தேவானந்த், “சட்டக் கல்லூரிகளில் காலியாக இருக்கும் இணை பேராசிரியர் உதவி பேராசிரியர் பணியிடங்களை விரைந்து நிரப்ப வேண்டும்,”என உத்தரவிட்டுள்ளார்.
மேலும் தமது உத்தரவில்,”காலிப் பணியிடங்களை நிரப்பும்போது இட ஒதுக்கீட்டு கொள்கையை கண்டிப்புடன் பின்பற்ற வேண்டும்.பேராசிரியர்கள் தேர்வு தொடர்பாக விதிகளை வகுக்க உயர் நீதிமன்ற ஓய்வு பெற்ற நீதிபதி பாரதிதாசன் தலைமையில் மூத்த வழக்கறிஞர் வில்சன், ஓய்வு பெற்ற ஐஏஎஸ் அதிகாரி மைதிலி ராஜேந்திரன் அடங்கிய நிபுணர் குழு அமைக்கப்படுகிறது. நிபுணர் குழுவின் ஆலோசனைகளை பின்பற்றி இணை பேராசிரியர்கள் மற்றும் உதவி பேராசிரியர்கள் நியமனங்களை மேற்கொள்ள வேண்டும்,”எனவும் உத்தரவிட்டுள்ளார்.