சென்னை: ஒரே நாளில் 6 முருகன் கோவில்களை தரிசிக்க அறநிலையத்துறை ஏற்பாடு செய்துள்ளது. இதற்காக ரூ.650 கட்டணத்தில் கும்பகோணத்தில் இருந்து சிறப்பு சுற்றுலா பஸ் வார இறுதி நாட்களில் இயக்கப்படும் என்றும், அதாவது, சனி மற்றும் ஞாயிற்றுக்கிழமைகளில் ‘சிறப்பு சுற்றுலா பஸ்’ இயக்கப்பட உள்ளதாக அறிவிக்கப்பட்டு உள்ளது.
இந்த ஆன்மிக சுற்றுலா சேவை வருகிற 19-ந்தேதி முதல் நடைமுறைக்கு வருகிறது.
இதுதொடர்பாக தமிழ்நாடு அரசு போக்குவரத்துக் கழகத்தின் கும்பகோணம் கோட்ட நிர்வாக இயக்குனர் பொன்முடி வெளியிட்டுள்ள செய்திக்குறிப்பில் , கும்பகோணம் அரசு போக்குவரத்து கழகம் சார்பில் டெல்டா மாவட்டத்தில் பிரசித்தி பெற்ற 6 முருகன் கோவில்களை ஒரே நாளில் தரிசிக்கும் வகையில் வார இறுதி நாட்களான சனி மற்றும் ஞாயிற்றுக்கிழமைகளில் ‘சிறப்பு சுற்றுலா பஸ்’ வருகிற 19-ந்தேதி முதல் இயக்கப்பட உள்ளது.
இந்த சிறப்பு சுற்றுலா பஸ் சேவையை திருப்பனந்தாள் அருணஜடேஸ்வரர் கோவில் வளாகத்தில் இருந்து போக்குவரத்துத்துறை அமைச்சர் சிவசங்கர், உயர்கல்வித்துறை அமைச்சர் கோவி. செழியன், திருப்பனந்தாள் காசி திருமடம் ஆதினம் ஸ்ரீலஸ்ரீ முத்துக்குமார தம்பிரான் சுவாமிகள் ஆகியோர் தொடங்கி வைக்கின்றனர்.
இந்த சிறப்பு சுற்றுலா பஸ்சானது கும்பகோணத்தில் இருந்து புறப்பட்டு எண்கண் சுப்பிரமணிய சுவாமி கோவில் (திருவாரூர் மாவட்டம்), சிக்கல் சிங்காரவேலர் கோவில், பொரவச்சேரி கந்தசாமி கோவில், எட்டுக்குடி சுப்பிரமணிய சுவாமி கோவில் (நாகப்பட்டிணம் மாவட்டம்), சுவாமிமலை சுவாமிநாதசுவாமி கோவில், ஏரகரம் ஆதி சுவாமிநாதசுவாமி கோவில் (தஞ்சாவூர் மாவட்டம்) ஆகிய 6 கோவில்களையும் பக்தர்கள் ஒரே நாளில் தரிசனம் செய்வதற்கு ஏதுவாக இயக்கப்படுகிறது.
இந்த பஸ்சில் பக்தர்கள் பயணம் செய்ய ஒரு நபருக்கு கட்டணமாக ரூ.650 நிர்ணயம் செய்யப்பட்டுள்ளது.
இந்த பஸ்சானது பிரதி வாரம் சனி மற்றும் ஞாயிற்றுக்கிழமைகளில் மட்டும் கும்பகோணம் மண்டல தமிழ்நாடு அரசு போக்குவரத்து கழகம் சார்பில் இயக்கப்பட உள்ளது.
இந்த சிறப்பு பஸ்சில் பயணிக்க விருப்பம் உள்ளவர்கள் www.tnstc.in என்ற இணையதள முகவரியில் முன்பதிவு செய்து, பயணச்சீட்டை பெற்றுக்கொள்ள வசதிகள் செய்யப்பட்டுள்ளது.
நேரடியாக பஸ்சில் பயணச்சீட்டு பெற்று க்கொண்டு பயணிக்க இயலாது.
இவ்வாறு அதில் கூறப்பட்டுள்ளது.
ஏற்கனவே கும்பகோணத்தில் இருந்து ஒரே நாளில் நவக்கிரஹ கோயல்களுக்கு சென்று வரும் வகையில் ரூ.750 கட்டணத்தில் சிறப்பு பேருந்துகளை இயக்கி வருவது குறிப்பிடத்தக்கது.
ஒரே நாளில் 6 முருகன் கோயில் தரிசனம்! ஆன்மிக சிறப்பு பேருந்துகளை இயக்க தயாராகிறது தமிழ்நாடு அரசு