கொல்கத்தா
இந்திய மருத்துவ கட்டமைப்பு நாளை மறுநால் கொல்கத்தா பெண் மருத்துவர் கொலைக்காக நாடு தழுவிய உண்ணாவிரத போராட்டம் நடத்த உள்ளது.
கொல்கத்தா நகரில் ஆர்.ஜி. கார் மருத்துவக்கல்லூரி மருத்துவமனையில் பணியாற்றிய 31 வயது பயிற்சி பெண் டாக்டர் ஒருவர், கடந்த ஆகஸ்டு 9-ந்தேதி அதிகாலையில் பலாத்காரம் செய்யப்பட்டு, பின்னர் கொடூர கொலை செய்யப்பட்டது நாடு முழுவதும் அதிர்ச்சி அலையை ஏற்படுத்தி உள்ளது. இச்சம்பவத்தில் சஞ்சய் ராய் என்பவர் கைது செய்யப்பட்டார். , கொல்கத்தா உயர்நீதிமன்ற உத்தரவையடுத்து, வழக்கில் சி.பி.ஐ. விசாரணை மேற்கொண்டு வருகிறது.
டாக்டர்களுக்கு பாதுகாப்பு கோரியும், பெண் டாக்டருக்கு நீதி வேண்டும் என கோரியும், கொல்கத்தாவில் பயிற்சி டாக்டர்கள் தொடர் போராட்டத்தில் ஈடுபட்டு வருகின்றனர். டாக்டர்களின் போராட்டம் ஒரு மாதத்துக்கும் மேலாக நீடித்த நிலையில் செப்டம்பர் 16ம் தேதி மருத்துவக் குழுவுடன் மேற்கு வங்க முதல்வர் மம்தா பானர்ஜி பேச்சுவார்த்தை நடத்தினார்.
அதில் டாக்டர்கள் கோரிக்கை முழுமையாக ஏற்கப்படவில்லை என்பதால் டாக்டர்கள் போராட்டம், உண்ணாவிரத போராட்டமாக மாறி இன்றுடன் 9வது நாளாக இளநிலை டாக்டர்கள் தொடர்ந்து உண்ணாவிரதப் போராட்டத்தில் ஈடுபட்டு வருகின்றனர். அவர்களின் உடல்நிலையும் மோசமடைந்து வருகிறது. போராட்டத்தில் ஈடுபட்டுள்ள இளநிலை டாக்டர்களுக்கு ஆதரவு தெரிவிக்கும் வகையில், வரும் 15-ம் தேதி நாடு தழுவிய அளவில் உண்ணாவிரதப் போராட்டத்தை இந்திய மருத்துவ கூட்டமைப்பு (ஐ.எம்.ஏ.) அறிவித்துள்ளது.
இது குறித்து வெளியிடப்பட்டுள்ள அறிவிக்கையில்,
“இந்திய மருத்துவ கூட்டமைப்பின் இளநிலை மருத்துவக் குழு மற்றும் மருத்துவ மாணவர்கள் சார்பில் இந்த ஒருநாள் உண்ணாவிரதப் போராட்டம் வழிநடத்தப்படும். நாளை மறுநாள் ( செவ்வாய்க்கிழமை) காலை 6 மணி முதல் மாலை 6 மணி வரை உண்ணாவிரதப் போராட்டம் நடைபெறும். மருத்துவக் கூட்டமைப்பினர் இதற்கு ஒத்துழைக்க வேண்டும்.
நியாயமான கோரிக்கைகளை வலியுறுத்தி கொல்கத்தாவில் நடைபெற்றுவரும் இளநிலை டாக்டர்களின் உண்ணாவிரதப் போராட்டம் 9வது நாளை எட்டியுள்ளது. போராட்டத்தில் ஈடுபட்டுள்ளவர்களில் 3 டாக்டர்கள் மருத்துவமனையில் அனுமதிக்கப்பட்டுள்ளனர். இதற்கு மக்கள் ஒத்துழைப்பும் உள்ளது. டாக்டர்களின் கோரிக்கையை ஏற்றுக்கொள்ள வேண்டும் என மேற்கு வங்காள முதல்-மந்திரிக்கு இந்திய மருத்துவ சங்கம் கோரிக்கை வைக்கிறது”
என்று தெரிவிக்கப்பட்டுள்ளது.