சென்னை: கிரிக்கெட் ரசிகர்கள் ஆவலுடன் எதிர்பார்த்துக் காத்திருக்கும், இந்தியா – இங்கிலாந்து டெஸ்ட் தொடர், நாளை(பிப்ரவரி 5) சென்னை சேப்பாக்கம் மைதானத்தில் தொடங்குகிறது.
இப்போட்டி, இந்திய நேரப்படி, காலை 9.30 மணிக்கு ஆரம்பமாகிறது.
பிப்ரவரி 5 முதல் 9ம் தேதி வரை முதல் டெஸ்ட் போட்டியும், பிப்ரவரி 13 முதல் 17ம் தேதி வரை இரண்டாவது டெஸ்ட் போட்டியும், சென்னை சேப்பாக்கம் மைதானத்திலேயே நடைபெறுகின்றன.
இந்நிலையில், இந்திய அணியில், ரோகித் ஷர்மா – ஷப்மன் கில் துவக்க ஜோடியில் மாற்றமிருக்காது என்று தெரிகிறது. அதன்பிறகு, புஜாரா, விராத் கோலி மற்றும் ரஹானே ஆகியோரின் இடத்திலும் மாற்றமிருக்காது என்று எதிர்பார்க்கப்படுகிறது.
ஆனால், விக்கெட் கீப்பராக சஹா மற்றும் ரிஷப் பன்ட் இருவரில் யார்? என்ற குழப்பம் நிலவுகிறது. மேலும், இந்திய அணியில் 2 வேகங்கள் மற்றும் 3 சுழற்பந்து வீச்சாளர்கள் இருப்பர் என்று தகவல்கள் தெரிவிக்கின்றன. அஸ்வினுடன் இடம்பெறவுள்ள அடுத்த 2 சுழற்பந்து வீச்சாளர்கள் யார் என்ற கேள்விக்கு இன்னும் விடை கிடைக்கவில்லை.