லண்டன்: ஏடிபி பைனல்ஸ் ஆண்கள் டென்னிஸ் தொடரின் ஒற்றையர் பிரிவில், உலகின் நம்பர் 2 வீரர் ரபேல் நாடல், அரையிறுதிக்கு முன்னேறியதைப் போல், உலகின் நம்பர் 1 வீரர் நோவக் ஜோகோவிக்கும் அரையிறுதிக்கு தகுதிபெற்றுள்ளார்.
இத்தொடரில், உலகத் தரவரிசையில் முதல் 8 இடங்களில் உள்ள வீரர்கள் மோதி வருகின்றனர். ரவுண்ட் ராபின் முறையில் போட்டிகள் நடைபெறுகின்றன.
‘ஏ’ பிரிவு லீக் போட்டியில், செர்பியாவின் நோவக் ஜோகோவிக், ஐந்தாம் இடத்திலுள்ள ஜெர்மனியின் அலெக்சாண்டர் ஸ்வெரேவுடன் மோதினார்.
இப்போட்டியை, 6-3, 7-6 என்ற செட் கணக்கில் வென்றார் ஜோகோவிக். இறுதியில், ஸ்பெயினின் ரபேல் நாடலைப் போலவே, 2 வெற்றிகள் & 1 தோல்வியைப் பதிவுசெய்த நிலையில், அரையிறுதிக்குள் நுழைந்தார் ஜோகோவிக்.
அரையிறுதிப் போட்டிகளில், ஜோகோவிக் – டொமினிக் தியம்(ஆஸ்திரியா) மற்றும் நாடல் – மெட்வடேவ்(ரஷ்யா) ஆகியோர் மோதுகின்றனர்.