சென்னை: தமிழ்நாடு சட்டப்பேரவையில், இன்றைய கேள்வி நேரத்தின்போது, காவல்துறை தொடர்பான உறுப்பினர் கேள்விகளுக்கு முதலமைச்சர் மு.க.ஸ்டாலின் பதில் அளித்தார்.
கடந்த 3 ஆண்டுகளில், 23 தீயணைப்பு நிலையங்கள், 72 காவல் நிலையங்கள் புதிதாக உருவாக்கப்பட்டுள்ளது என்று தெரிவித்தார்.
தமிழ்நாடு சட்டப்பேரவை பட்ஜெட் கூட்டத்தொடர் நடைபெற்று வருகிறது. இன்றை சட்டப்பேரவை அலுவல்கள் தொடங்கியதும், மறைந்த அதிமுக முன்னாள் உறுப்பினர் கருப்பசாமி பாண்டியன் மறைவுக்கு இரங்கல் தெரிவிக்கப்பட்டது. இதையடுத்து கேள்வி நேரம் தொடங்கியது. அப்போது உறுப்பினர்களின் கேள்விகளுக்கு துறைசார்ந்த அமைச்சர்கள் பதில் அளித்தனர். காவல்துறை தொடர்பான கேள்விக்கு முதலமைச்சர் பதிலளித்தார்.
ஆவுடையார்கோவிலில் சட்டமன்ற உறுப்பினர் ராமச்சந்திரன், தனது தொகுதியில் தீயணைப்பு நிலையத்துக்கு புதிய கட்டடம் கட்டும் பணி குறித்து கேள்வி எழுப்பினார்.
இதற்கு பதில் கூறிய முதல்வர் ஸ்டாலின், தீயணைப்பு நிலைய கட்டிடம் கட்டும்பணி ரூ.2.59 கோடியில் வரும் மே மாதம் பணிகள் தொடங்கி அடுத்த ஆண்டு பிப்ரவரியில் திறக்க திட்டமிட்டு உள்ளதாக தெரிவித்தார்.
அறந்தாங்கியில் புதிய காவல் நிலையம் அமையுமா என்று உறுப்பினர் ராமச்சந்திரன் கேள்வி எழுப்பினர்.
இதற்கு பதில் கூறிய முதல்வர், கடந்த ஆண்டுகளில் பதிவான வழக்குகளின் அடிப்படையில் பார்த்தால் புதிய காவல் நிலையம் அமைக்க அவசியம் எழவில்லை என்று கூறினார்.
சென்னை அயப்பாக்கம் பகுதியில் தீயணைப்பு நிலையம் அமைக்க அரசு முன்வருமா என உறுப்பினர் கணபதி கேள்வி எழுப்பினார். இதற்கு பதில் அளித்த மு.க.ஸ்டாலின் அயப்பாக்கம் பகுதியில் தீயணைப்பு நிலையம் அமைக்க வேண்டிய தேவை எழவில்லை என்று தெரிவித்தார்
கோவை சூலூர் தீயணைப்பு நிலையத்துக்கு நிரந்தர கட்டடம் கட்ட இடம் கண்டறியப்பட்டுள்ளது, அங்கு எப்போது கட்டிடம் கட்டப்படும் என்று சட்டமன்ற உறுப்பினர் கந்தசாமி எழுப்பிய கேள்விக்கு பதில் கூறிய முதலமைச்சர், காவல் நிலையம் வேண்டும், தீயணைப்பு நிலையம் வேண்டும் என்று பல உறுப்பினர்கள் கோரியுள்ளனர்.
ஆனால், இதுவரை 72 காவல் நிலையம் புதிதாக உருவாக்கப்பட்டுள்ளது, அத்துடன் 23 தீயணைப்பு நிலையங்கள் புதிதாக தொடங்கப்பட்டுள்ளது. மேலும் உறுப்பினர்களின் வேண்டுகோளின்படி, சாத்தியக்கூறு அடிப்படையில் புதிய காவல் நிலையம் மற்றும் தீயணைப்பு நிலையம் கட்ட நடவடிக்கை எடுக்கப்படும் என்றார்.
மேலும், காவல்துறை மானியக் கோரிக்கையில் உறுப்பினர்கள் திருப்தி அடையும் வகையில் புதிய அறிவிப்புகள் வெளியாகும் என்று முதலமைச்சர் கூறி யுள்ளார்.