சென்னை: 70வது பிறந்தநாள் கொண்டாடும் முதலமைச்சர் மு.க.ஸ்டாலினுக்கு பிரதமர் மோடி பிறந்தநாள் வாழ்த்து தெரிவித்துள்ளார். மேலும், கவர்னர் தமிழிசை, திமுக எம்.பி. கனிமொழி, அமைச்சர் உதயநிதி ஸ்டாலின் மற்றும் பாஜக மாநில தலைவர் அண்ணாமலை, தேமுதிக தலைவர் விஜயகாந்த், இளையராஜா உள்பட அரசியல் கட்சியினர், திரையுலகினர் என பலர் வாழ்த்துக்களை தெரிவித்து வருகின்றனர்.
திமுக தலைவரும், முதலமைச்சருமான மு.க.ஸ்டாலின் தனது 70-வது பிறந்தநாளை இன்று கொண்டாடுகிறார். அவரின் பிறந்தநாளுக்கு பல்வேறு அரசியல் கட்சி தலைவர்கள், திரைப்பிரபலங்கள் பலரும் முதலமைச்சருக்கு பிறந்தநாள் வாழ்த்து தெரிவித்து வருகின்றனர். இந்த நிலையில், முதல்-அமைச்சர் மு.க.ஸ்டாலினுக்கு பிரதமர் நரேந்திர மோடி பிறந்தநாள் வாழ்த்து தெரிவித்துள்ளார்.
முதலமைச்சர் மு.க.ஸ்டாலினுக்கு திமுக இளைஞரணி சார்பில் அமைச்சர் உதயநிதி ஸ்டாலின் பிறந்தநாள் வாழ்த்து தெரிவித்து உள்ளார். அரை நூற்றாண்டு மேலாக பொது வாழ்வில் மக்கள் பணியாற்றும் தலைவர் முதலமைச்சர் மு.க.ஸ்டாலினுக்கு பிறந்தநாள் வாழ்த்துக்கள் என்று கூறியுள்ளனர்.
பிரதமர் மோடி வெளியிட்டுள்ள வாழ்த்து செய்தியில், “தமிழக முதல்-அமைச்சர் மு.க.ஸ்டாலின் அவர்களுக்கு இனிய பிறந்தநாள் நல்வாழ்த்துக் களைத் தெரிவித்துக் கொள்கிறேன். நீண்ட ஆயுளுடனும், ஆரோக்கியத்துடனும் வாழ வாழ்த்துகிறேன். எல்லாம் வல்ல இறைவனை வேண்டுகிறேன்!”என்று தெரிவித்துள்ளார்.
புதுச்சேரி துணைநிலை ஆளுநர் தமிழிசை சௌந்தரராஜன் வெளியிட்டுள்ள பிறந்தநாள் வாழ்த்து செய்தியில், மாண்புமிகு தமிழக முதலமைச்சர் அண்ணன் மு.க.ஸ்டாலினுக்கு மனமார்ந்த பிறந்தநாள் வாழ்த்துக்கள் என்று குறிப்பிட்டுள்ளார். மக்களுக்கு தினமும் முழு உடல் நலத்துடன் கடமையாற்ற பிரார்த்தித்து வாழ்த்துகிறேன் என்றும் அவர் குறிப்பிட்டுள்ளார்.
டெல்லி முதலமைச்சர் அரவிந்த் கெஜ்ரிவால் வெளியிட்டுள்ள வாழ்த்துச் செய்தியில், நீண்ட நாள் ஆரோக்கியமான ஆயுளுடன் வாழ இறைவனை பிரார்த்திக்கிறேன் என்று தெரிவித்துள்ளார்.
திமுக எம்.பி.யும், மு.க.ஸ்டாலினின் சகோதரியுமான கனிமொழி, தனது இன்ஸ்டாகிராமில் வாழ்த்து தெரிவித்துள்ளார். அதில், “தொடர்ந்து விமர்சனங்கள் காழ்ப்புணர்வு இவற்றை எல்லாம் கடந்து தன்னுடைய ஓய்வறியாத உழைப்பால் இன்று வெற்றி பெற்று நின்று கொண்டிருக்கக் கூடிய நம்முடைய தலைவர் அண்ணன் தளபதி அவர்கள் தலைவர் கலைஞர் சொன்னது போல உழைப்பு உழைப்பு உழைப்பு என்ற தன்னுடைய அமைதியான உழைப்பால் இன்று திராவிட முன்னேற்ற கழகத்தை வெற்றி பாதையிலே நடத்தி சென்று கொண்டிருக்க கூடிய தலைவர் நம்முடைய தலைவர் அண்ணர் தளபதி அவர்கள். இன்று அவரது 70வது பிறந்த நாள் அந்த பிறந்தநாளிலே இன்று நாடு முழுவதுமே பாசிசத்தை எதிர்ப்பதற்கு தன்னுடைய கொள்கை பிடிப்பால் தொடர்ந்து போர் தொடுத்து கொண்டிருக்க கூடிய அண்ணன் தளபதி அவர்களை நம்பிக்கையோடு உற்று நோக்கிக்கொண்டிருக்கிறது. இந்த நாளிலே அவருக்கு என்னுடைய பிறந்த நாள் வாழ்த்துக்களை நன்றியோடு தெரிவித்துக்கொள்கிறேன்” என தெரிவித்துள்ளார்.
தேமுதிக பொதுச்செயலாளர் விஜயகாந்த் வெளியிட்டுள்ள வாழ்த்து பதிவில், இன்று 70வது பிறந்த நாள் காணும், தமிழக முதல்வர், திமுக தலைவர், அன்பு சகோதரர் மு.க.ஸ்டாலின் அவர்கள், நல்ல உடல் ஆரோக்கியத்துடன் பல்லாண்டுகள் வாழ்ந்து மக்கள் சேவையாற்ற இறைவனை பிரார்த்திக்கிறேன் என தெரிவித்துள்ளார்.
பாஜக மாநில தலைவர் அண்ணாமலை வெளியிட்டுள்ள வாழ்த்து செய்தியில், “தமிழக முதல்-அமைச்சர் மு.க.ஸ்டாலின் அவர்களுக்கு இனிய பிறந்தநாள் நல்வாழ்த்துக்களைத் தெரிவித்துக் கொள்கிறேன். நீண்ட ஆயுளோடு, பொது வாழ்வில் இன்னும் பல ஆண்டுகள் அவரது பணி தொடர எல்லாம் வல்ல இறைவனை வேண்டுகிறேன்!”என்று தெரிவித்துள்ளார்.
திக தலைவர் கி.வீரமணி வெளியிட்டுள்ள வாழ்த்துச் செய்தியில், ‘உழைப்பால் உயர் நிலையை அடைந்த உன்னத தலைவர் முதல்வர் மு.க.ஸ்டாலினுக்கு பிறந்தநாள் வாழ்த்துக்கள்’ என கி.வீரமணி தெரிவித்துள்ளார்.
பாமக நிறுவனர் டாக்டர் ராமதாஸ் வெளியிட்டுள்ள வாழ்த்துச் செய்தியில், முதலமைச்சர் மு.க.ஸ்டாலின் நல்ல உடல்நலத்துடன் நூறாண்டு வாழ வாழ்த்துக்களை தெரிவித்துக்கொள்கிறேன், அனைத்து தரப்பினரின் நியாயமான எதிர்பார்ப்புகளை நிறைவேற்றி நல்லாட்சி வழங்கிட வாழ்த்துக்கள்’ என முதல்வர் மு.க.ஸ்டாலினுக்கு ராமதாஸ் பிறந்தநாள் வாழ்த்து தெரிவித்துள்ளார்.
பாமக தலைவர் அன்புமணி ராமதாஸ் வெளியிட்டுள்ள வாழ்த்துச் செய்தியில், “இன்று 70வது பிறந்தநாள் காணும் தமிழ்நாடு முதலமைச்சரும், தி.மு.க தலைவருமான மு.க.ஸ்டாலினுக்கு வாழ்த்துகளை தெரிவித்துக்கொள்கிறேன். அவரது பொதுவாழ்வு பணி தொடர வாழ்த்துகிறேன்” என வாழ்த்து தெரிவித்துள்ளார்.
இசையமைப்பாளரும், எம்.பி.யுமான இளையராஜா வெளியிட்டுள்ள வீடியோ வாழ்த்து செய்தியில், “நீண்ட ஆயுள், நிறை செல்வம், ஓங்கு புகழோடு வாழ வேண்டும்” என குறிப்பிட்டு வாழ்த்து தெரிவித்துள்ளார். இதேபோல் தெலங்கானா ஆளுநர் தமிழிசை சௌந்தரராஜன் வெளியிட்டுள்ள ட்வீட்டில், ”மாண்புமிகு தமிழக முதலமைச்சர் அண்ணன் திரு.மு.க.ஸ்டாலின் அவர்களுக்கு எனது மனமார்ந்த பிறந்த நாள் வாழ்த்துக்கள்… மக்களுக்கு “தி”னமும் “மு”ழு உடல் நலத்துடன் “க”டமையாற்ற பிரார்த்தித்து வாழ்த்துகிறேன்” என தெரிவித்துள்ளார்.
தமிழ்நாடு முதலமைச்சர் மு.க.ஸ்டாலின் நாளை தனது 70வது பிறந்தநாளை கொண்டாடுகிறார். இதனை முன்னிட்டு அவருக்கு திமுக தொண்டர்கள், அரசியல் கட்சி தலைவர்கள், திரையுலகப் பிரபலங்கள் என பலரும் வாழ்த்துக்களை தெரிவித்து வருகின்றனர். முன்னதாக இன்றைய தினம் நடிகர் ரஜினிகாந்த் வீடியோ ஒன்றை வெளியிட்டு முதலமைச்சர் மு.க.ஸ்டாலினுக்கு வாழ்த்து தெரிவித்திருந்தார். அதுபோல மாநில அளுநர் அர்என்.ரவியும் வாழ்த்து தெரிவித்துள்ளார்.