நீலகிரி மாவட்டத்தில் நடப்பு கல்வியாண்டில் 28 அரசு தொடக்கப் பள்ளிகளில் ஒரு மாணவர்கூட சேராதது பள்ளிக் கல்வித்துறையில் கவலையை ஏற்படுத்தியுள்ளது. பெற்றோர் தனியார் பள்ளிகளை அதிகம் நாடத் தொடங்கியுள்ளனரா என்ற கோணத்திலும் அதிகாரிகள் ஆய்வு நடத்தி வருகின்றனர்.
கடந்த ஆண்டு அரசு பள்ளிகளில் முதலாம் வகுப்பில் 2,100-க்கும் மேற்பட்ட மாணவர்கள் சேர்ந்திருந்த நிலையில், இந்த ஆண்டு அந்த எண்ணிக்கை 1,700-க்கும் குறைவாக சரிந்துள்ளது. மேலும், 28 அரசு தொடக்கப் பள்ளிகளில் மாணவர் சேர்க்கை பூஜ்யமாக பதிவாகியுள்ளதாக மாவட்ட முதன்மைக் கல்வி அலுவலர் தி. திருநாவுக்கரசு தெரிவித்தார்.
இதுகுறித்து, சம்பந்தப்பட்ட பள்ளித் தலைமை ஆசிரியர்களுடன் ஆலோசனைக் கூட்டம் நடத்தப்பட்டு காரணங்கள் ஆய்வு செய்யப்பட்டன. மாணவர் சேர்க்கை இல்லாத பள்ளிகளில் பெரும்பாலானவை குன்னூர், கோத்தகிரி மற்றும் உதகை கல்வி வட்டாரங்களில் அமைந்துள்ளன.
மாவட்டத்தில் உள்ள அனைத்து பள்ளிகளிலும் மாணவர் எண்ணிக்கை கடந்த ஆண்டு 97 ஆயிரமாக இருந்த நிலையில், இந்த ஆண்டு 87 ஆயிரமாக குறைந்துள்ளது. மாவட்டத்தை விட்டு மக்கள் இடம்பெயர்தல், பிறப்பு விகிதம் குறைதல் உள்ளிட்ட காரணங்களால் பள்ளி செல்லும் வயதுடைய குழந்தைகளின் எண்ணிக்கை குறைந்திருக்கலாம் என அதிகாரிகள் தெரிவித்தனர்.
மாணவர் சேர்க்கை இல்லாத 28 பள்ளிகளின் தலைமை ஆசிரியர்கள், அடுத்த கல்வியாண்டில் மாணவர் சேர்க்கையை அதிகரிக்கும் வகையில் விழிப்புணர்வு முகாம்கள் நடத்த அறிவுறுத்தப்பட்டுள்ளனர்.
இந்தப் பள்ளிகள் பெரும்பாலும் தொலைதூரப் பகுதிகளில் அமைந்துள்ளதால் ஏற்கனவே மாணவர் எண்ணிக்கை குறைவாக இருந்தது. சில கிராமங்களில் கடந்த சில ஆண்டுகளாக குழந்தைகள் பிறக்காததால் பள்ளியில் சேரும் வயதுடைய குழந்தைகளே இல்லாத நிலையும் ஏற்பட்டுள்ளது என கல்வித்துறை தெரிவித்துள்ளது.
இதுபோன்ற சூழல் இருந்தாலும், எந்தப் பள்ளியையும் மூடும் திட்டம் தற்போது இல்லை என்றும் கல்வித்துறை அதிகாரிகள் உறுதிப்படுத்தியுள்ளனர்.
[youtube-feed feed=1]